Thapa & Rani nati gold medal angu

Mongputeni/October 31, 2019 (Agencies): Brehostibarnü boxer tem atema Olympic Test Event final nung Shiva Thapa (63kg) aser Pooja Rani (75kg) nati gold medal nguogo aser kasa mapang nung Ashish-i (69kg) silver medal kokteta liasü.
Asian championship nung medal pezüben tashi kokteter alisang Thapa-i final nung Kazakhstan, national champion aser Asian bronze medalist Sanatali Toltayev 5-0 agi koka liasü. Thapa ya national champion lir aser pai taoba mapang world championships nung bronze medal koktetogo.
Kasa mapang nung Rani-ia final asaya nung Australia tsür Caitlin Parker madak takok ngua Indian women contingent atema gold medal ka koktettsüogo. Taküm küm tetenzüklen Rani-i Asian Championships nung silver medal ka kokteta lir.
Ajisüaka 69kg final asaya nung Japan nunger asayar Sewon Okazawa-i Ashish koka pai silver medal dang ngutet.
Bodhbarnü kasa asayamung semi-final asaya nung taoba mapang junior world champion Nikhat Zareen (51kg), Simranjeet Kaur (60kg) den Asian silver-medallist Sumit Sangwan (91kg) aser Vahlimpuia (75kg) nunger ajak tamakok ngua bronze medal dang koktet.