THCC-i Ungma nung Mountain Biking tetoktepba ayonger

Mokokchung, December 14 (TYO): Tawa Mokokchung kübok Fazl Ali College compound nung XCE 2016 tetoktepba takok ngua agir telok, Trial Hounds Cycling Club (THCC)-i maneni Ungma yimtsüng nunga cycle tetoktepba tanga ka tan December ita 16 nü agitsü ayongogo.
Ungma yimtsüng nung cycle anishitsüren tenzüktsütsü aser idakji tentetba Nature Park Mountain Biking Park (MTB) Park küma melenshitsütsü nükjidong nung par teloki tan tetoktepbaji ayongba osang angazükogo.
Nüburtemi mountain biking saisapongtsü sabang nung shilem agiba ajanga pei lokti tentet aser rongsenren jenjang tajungba kümdaktsütsü nükjidong yur THCC teloki tan par mapatongji tenzüka lir.
Tan Ungma nung tentettsü renembaji Nagaland ajunga nung MTB Park mezüngbuba tenteter asütsü aser tejangrartemi MTB Park nung sen talang agütsür telatet mapang atema cycle anishia, pei MTB tashitemet tajungba kümdaktsütettsü.
Tan tetoktepba nung Men’s Cross Country Race, Women’s Cross Country Race aser Men’s Enduro MTB densema, tetoktepba shilem 3 tashi ayonga agitsü renema lir.
MTB Park acha ayanger, Asemjungba Semchir Ungma (ASU)-i nungdakba senotsü teyari agüja, tan tetoktepbaji agitsü renemogo.
Iba tetoktepba ya Mokokchung nung alirtem atema dang alitsü aser tejangrartemi tetoktepba anogo nung dang pei tenüng tetoktepdak züluoktettsü.
Tetokteper ajungai terenemshiba agitsü atema tetoktepdak anepdang 9:00 ako nung atongtsü aser parnok ajungai helmet aser gloves asemtsü temetettsü olen ka THCC nung Tir, Atoba Longkumer-i tanü sangdong ka ajanga metetdaktsüogo.