‘The Accountant’ film Box Office nung No.1 kümogo

Washington, October 18 (Agencies): Hollywood actor, Ben Affleck-i tongti shilem agiba film, ‘The Accountant’ tawa sayaba sülen North America Box Office nung temaba jenjang anguba film kümogo.
Affleck dak alaka, Anna Kendrick aser Jon Bernthal nati shilem agiba film-i taoba hopta tatemlen tashi nung ajak agi dollar sen million 25 shi aazükba osang ka New York Times-i metetdaktsü.
Iba film yanglutsü asoshi Warner Bros. Pictures teloki dollar sen million 40 shi intokba den maneni alima ajunga nung film osang prokshitsü maparen nung sen million 10 shi intokba osang angazükogo.
Gavin O’Connor-i direct süa yangluba ‘The Accountant’ film nung Affleck-i autism ta ajaba pei indang dang bilemba aser tangar den junga tongtepratep mesütetba tashidak aketer ongko mongin ka ama shilem agir.
Warner teloki iba film ya US kübok Los Angeles yimti nung tan October ita 10 nü mezüngsüa sayaba sülen tanüngba US linük nung tan October ita 14 nü saya liasü.