‘The Creed of Violence’ nung Daniel Craig adentsü

Tsüklai/February 21 (Agencies): Taruba project tasen ka nung Daniel Craig-i Rawbone shilem agitsü ternemba lir.
Boston Teran indang novel ‘The Creed of Violence’ nung ajemdaker yanglutsü aliba kasa nüngja film ya Todd Field-i direct asütsü.
Arishi küm 50 tain actor Daniel-i Cary Fukunaga indang ‘Bond 25’ film maparen tembangba sülen pai project tasenba nung inyak tenzüktsü, ta Collider sangdong ajanga metetdaktsü.
Iba movie ya nisung tamajung ka tenüng agi Rawbone (Daniel) shibai America arrtsü alema Mexico linüki truck ka sünga prangbong oshir shibelenba indang otsü asütsü.
Iba shibelenba maparen ya Federal Bureau of Investigation (FBI) putetba sülen pa nem undercover agent ka inyaktsü asoshi ketdangsertemi nüngloktsür.
Film maparen ya 2020 küm nungi tenzüktsü aser Brian Oliver-i pa indang New Republic Pictures atema Filmula nungi Johnny Lin den longjema produce asütsü.
2011 küm arishi küm 54 tain Field nem mezüngbo Teran indang novel nung ajemdaker script züludaktsütsü aser ternemba liasü saka iba sülen pai iba film direct asütsü atema züngzüktep.
Rawbone shilem atema mezüngbo Leonardo Dicaprio aser Christian Bale naprongla nem shilem agidaktsütsü atema tebilemba liasü saka 2013 küm senotsü tsütsü tetsükdaktsü ajuruba ajanga iba project meyanglutet.
Taruba 007 film ya February 14, 2020 nü sayatsü ternemba liasü saka film sayatsü anogo ya April 8, 2020 tashi atsülangtsüogo, ta temalen MGM-i sangdongogo.
‘Bond 25’ film nung Daniel Craig den külemi Naomie Harris, Ralph Fiennes aser Lea Seydoux nungeri shilem agitsü renema lir.
2015 küm ‘Spectre’ film nung arishi küm 33 tain Lea-i Dr. Madeleine Swann shilem agiba ajaki jangjaa lir aser Craig o Fukanaga teayari ajanga lai ano tanaben project tasenba nung shilem agiba angutsü.