‘The Eternals’ atema Keanu Reeves anioktsü

Aami/June 03, 2019 (Agencies): Marvel Cinematic Universe (MCU) indang taruba film ‘The Eternals’ nung actor Keanu Reeves anioktsü asoshi jembidar, ta osangtem ajanga metetdaktsü.
Osang ajanga angazükba agi, ‘Toy Story 4’ nung tongti shilem agisang Keanu-i MCU nung ajemoka taruba project nung shilem ka agitsü renemdar. Iba project dak sendakba maparentem taküm küm tatemlen ka nungi tenzüka inyaktsü.
‘Speed’ nung shilem agisang Keanu ya iba blockbuster film nung role ka lemzüktsütsü asoshi tejembidak lir. Iba film nung Keanu den külemi Richard Madden-i shilem agitsü, ta MCU Cosmic ajanga metetdaktsü.
Taoba mapang film yanglutsü osang sangdongdang, ‘Rocketman’ film nung tongti shilem agisang Taron Egerton nem Ikaris shilem lemzüktsütsü jembia liasü.
Osangtem ajanga angazükba agi, The Eternals film atema Angelina Jolie den külemi Ma Dong-Seok anioka liasü.
Arishi küm 48 tain Ma Dong-i 2013 küm sayaba zombie thriller film ‘Train To Busan’ nung shilem agiba ajaki jangjaa lir. Ajisüaka, ‘Tourist’ film nung shilem agisang Ma Dong nem taruba film atema lemzüktsüba role osang sangdonga mali.
Chloe Zhao lenisüba kübok yanglutsü aliba film ya 1976 küm Jack Kirby-i züluba Marvel comics nung ajemdaker yanglutsü.
Purapitetba otsü – The Eternals nung superhero tem yagi tsükchir – Deviants tem den ain amshia rara alima kümzüker.
The Eternals film ya Jolie indang mezüng superhero film ka asütsü. 2008 küm sayaba Wanted film nung Jolie-i shilem magi tsüngda, lai comic book movie ka nung shilem agia liasü. Iba film ya Eternals liasü, koba Mark Millar aser J.G. Jones naprongla longjema zülu.
Iba movie indang script zülutsü atema ‘Ruin’ writer Matthew aser Ryan Firpo nati tezüngzüktep agiogo. Kasa mapang Marvel Studios’ tir Kevin Feige-i iba film produce asütsü.