The Grace Home Rehabilitation, Tuli

– Mrs. Meyisongla,
Retd. Dy. Director Nursing, Nagaland : Kohima.

Asenoki kanga junga belemdangra, koba lima, koba lokti, shir kibong aser nisung temoatsü agi tama semdangdir parnokji kanga jangratemtsü mesüker, parnokji tenükshitsü ka. Meimchir kodang temoatsü manung lidir aikati aji peisasa angu ama bilemer. Teyanglur Tsüngrem amadoker, ajemalutsü melen asü akümer. Oda pur medemer hauta mali, temoatsü to tejashi aser mazükmaru agi melener, aser atakatem ajangzüker .Asen lima min tamang, tekong tenem tulu, aser longren longpang tudanga lenden tesatem küma aser ayong tarok ajak nung apu tajong yanglua Amguri nungi Mokokchung tashi lenmang tajung atu. Aser tamanga mamang 1952 -1953 küm nongibo gari agi Mokokchung atong.Ibai kangasa tesüngmangtsüka liasü. Iba lemang dang” LANGPANGKONG LEMANG” ta aja. Iba lemang ya kangasa tongtipang aser nungtugu lemang ka aküm [NHW.61 ]. Nuburtem oli-aratsü kanga tezüpaba aküm. Küm 15-20 tsüngda Langpangkong nunger aika takar küma gari alia amshi. Assam lima nungi taginutsü osettsüset eg. dokan osettem shibelena ayok. Oda mapang ka nungbo chi ken nanga mechiyongra Amguri lua hotel nung chiyonger atuba indanga jembia liasü. 1970-80 sülen asen lima mopong kanga tesashi aser tamajong kati atong. Oda ajongbena tsünglu tulu arua tzü metsüng nung janaona, süngdonglidong, shiruru aser meimchirtem ponger aoba menokdangtet ama asen lima kanga tamang tia kati atong. Kolen nungi aser shibai tama asen limai temesepba yi aser mozü bener arua asen chirtem talisa jabasotem temesepba yi aser [DRUGS] -mozü-agi leter yiramata sowar kümer aliba angu. Shipai tama temesepba mozüji menakdangger jangratema sulia ao, mapang tatsüka atema alima tebelemtsü shisabulu amaa mejanger saker, saka mozü to chinüa bushia sak. Anungji tanaben mozü to bushilen senzür. Ibai temenatepba tashidak, asangur rongnong kanga karaa prokshi. Parnok telok telok oli aruli ta nemzütep. Kidang mapa inyaktsü mebelemer, schooli maor, saka mozü bushia achitsü dang belem. Asen juli nungi sen auyar, osettsüset eg tula, suoshi tamalangyong ayok. Mozü agi leter asütsü tsübuba agi aonung memejanger, anepdang mejangbaji anü meshia mesaker. Oda asangurtem dang masü kiyim lanur dena mozüji achir, kidang kibong nung rongrong atener, pala onlar jenti adok. Arogo/yimten mapa aser Government mapa nung dena timtem tulu adokba angashir aser angur. Ao lima tanga tsükong nunga mozü chirtemji karbo liasü saka oliora sademba Langpangkong yimtsüng aser Town nungbo lanur ajak achir ama angashi. Iba mapangibo mozü chirji nübur ajaki tsübur aser sempar. Tapu tapu inyakdanger saka makoker. Yimden yimsususertemi aser Governmenti parnok pur, senchi tulu achi, jail nong merangian agi aliner ayur, saka yaa kia makok. Yimtsüng shia shiki mesang süng agi ozü kirang ama yanglur yangjia ayur, saka item treatmen ajak ya amajok liasü. Anogo shia mozü chirtemji teimba teimba renloka aoba angashia yamai dangsa doktsüra alima ya majungtsü, langkabosa inyaktsüla ta bilem saka kechi inyaktsü, shibai inyaktsü, kong nungi tenzüktsü, komala ka inyak nung ajongtsü ta bilem. Kanga dang sarasadema, Tsüngrem dang shisatsü meshir onok anasemka Langpangkong nung yimtsüng ishika sema Arogo aser yimten tanishirtem den ajurutepa, parnok yimtsüngtem nunga mozü chirtem komasa ali aser nenoki parnok dang kechisa inyaker itemji jembia lua Tuli Town atong. Aser mozüchirtemji kangasa temeimtsü tia nung shiruru dang tamajungba tia nung liasüba angu. Tuli town nung council membertem, Arogo 5 nongi pastortem aser MR. Shilukokba, MR Zülutemjen, Mrs. Meyisongla aser Mrs. Sentikümla ta meeting ka amen. Iba meeting nungji itemi lemtet. Tuli town nung shihsadokten [Awareness Seminar] ka tongtipang onüktem Alcoholism, Drug addiction, Sexually transmited diseases like HIV/AIDS, Dedoxification, Diagnosis, Treatment aser Rehabilitation May ita 29-31-2002 nong alitsü. O jembirtemji- Dr . Yanger Lemtur -psychiatrist C.H.Mkg, Dr.Limaaküm Jamir-Pathologist Civil Hospital Dimapur, Dr. Mahabemo Ovung -Dermodologist Civil Hospital Dimapur, Program Director Mrs. Sentikümla New Life Ministry Dimapur aser Program Co-ordinator Mrs. Meyisongla Deputy Director Nursing Kohima Nagaland. Seminar nung Langpangkong yimtsüng aser town shia nungi Council Chairman/Seecretary, Pastor/Arogo Secretary aser Tesayula atentsüla ta renem. Nagaland state AIDS control society dang sponsor asütsü asüngdangtsü renem. Programji Board member aser Staff GHRCT-i organise asütsü renem.
Sarasatema renemba ama iba program kanga takok ngua agitet. Program Sentep shia, Menden, Sarasatemtsü, Tajungshi aser tepela o jembertem aser ken atenertemji-town council membertem, Arogo pastor aser youth temi lemsar bendanga agi. Tuli town, Tuli lenden, Luyong, Aitlenten aser Tzüdikong Baptish churches tem longjemer iba Grace Rehabilitation Home Tuli reprangtsü lemtet. Lemtetba ama, tanü tashi parnoki nungita ajaayanger. Iba seminar nong nisung 300 shi aden. Yangi mozü chir 28 dena liasü. Drugs acher tsürapur aser achirtemi mepishiba ama parnok mozü chir teranati (12) iba Home nung monga tenzük. New Life ministry nungi teyaritep tulu agüja anep alua aru. 2002-2016 tashi nung iba kidang arua treatment agirtemji ajak agi 1066. Item rongnong tang tashi nung 898 junga lir, relapse asürtem 118 aser tia makai parnok nisung 50 suogo. Iba Grace Home Rehabilitation Centre nung amongertemji Ao, Phom, Konyak, Tuensang area, Mao, Arunachal Pradesh aser tesem balala nungi nuburtem arua amonger. Tang telidak parnok 24 lir. Iba Grace Home ya Government of Nagaland Home Department nung Societies Registration Act nung register suogo. Iba Registration NO-SRC /Home/RNW/120/2014” dated the 30th January 2015. Kanga takok ngua bener aoba Yi aser Drugs Rehabilitation center Nagaland nong Tuli Grace Home Rehabilitation center ya ah ka alitsü sudi. Kechiba ta süra Tuli town, Tuli lenden, Luyong, Aitlenden aser Tzüdikong Baptish Arogo pungui sponsor asür. Parnoki sen, nubo, shisatsü aser sarasatemi iba Home nongiter. Ano talisa community leadertemi kanga temolung agüja parnok melentepa iba Home Board Member nung dener nüngdak ajak inyaker. Iba dak alaka Tuli Town meküta aliba yimtsüngtem aser Tuli nong alirtem yim balala telok tenteti sarasadem, counselling sen aser chiyongtsü agi maneni yarir. Nisung aikati chibo anpu, sintex, water pump, television set, computer set, chairs, ak aser an project agütsüa arudagi. 2016 küm March ita nung künep Mr.Shilukokba Tuli nongi ozü kidangi arur Tuli Grace Home Rehabilitation center nung amonger parnok 27 lir saka yipden mali, ali nung dang mejanger aser ajakagi yipden 30 nüngdaker ta ashi. Süra aji yanglutsü-senji ni agütsüdi ta shir Rs. 40,000/- agüja yipdenji yangludaktsü. Tuli Grace Home takok angubaji nisung aika teyaritep agi takok angur. Saka Talisa Mr & Mrs.Shilukokba, Longkhum tena ajanga lir. Tena angati nubo aser rongsen den shisatsü ajak agi-item mozü chirtemji meima anepalur aser nungitba agi lir. Iba Grace Home Rehabilitation Program ya Mr. Zülutemjen, Mopungchuketi tenzüka doktsü. Iba sülen parnok aika melentepa repranga arur, tang Mr. Kilang Imsong, Residential Counseller-i reprangdagi.
Iba Article azünger ajak dang maneni sarasatemtsütsü mepishir.