The Great Decade band ajanga NCF Night nung shilem agi

The Great Decade band ajanga NCF Night nung shilem agi

Dimapur, Luroi/August 14 (TYO): Chennai nung Naga Christian Fellowship (NCF) Night ya August 12, 2019 anogo C.S.I. St.Matthias Church open amphitheater nung agia liasü, kong Nagaland nungi nüngtugu kentener telok, The Great Decade ajanga shilem agi. Iba sentong nung parnoki ken ter aten aser item rongnung parnoki mejemba ken ana dena liasü. Iba kentener telok ya 2016 küm tentet aser 2017 küm Hornbill International Rock competition nunga shilem agia lir. Parnoki tang tesüsa Chennai semdangba mapang August 9, 2019 anogo Goddy’s Café nunga ken tena liasü. The Great Decade telok nung züngsemtemji Temsuwapang (Vocal), Anok (Drums), Senti (Lead Guitarist) aser Tongpang (Bassist) nungertem alitsü.
NCF Night sentong nung tongti tesemdanger ya Thirunavukkarasu, IPS, Deputy Commissioner of Police Greater Chennai City Police liasü aser pai sentepa alirtem dang, Chennai nung kechi nükjidong nung arua alir, iba nükjidong nung rangloktsü ajungshia liasü. Paisa Northeast nungi aruba nüburtem den Chennai City Police ajanga nüngdakba ajak nung yariteptsü mulunga lir, ta ashi. Paisa Northeast nüburtem dang pei senti taküm kanga junga anepalutsü aser Chennai nung aliba mapang taküm nung telemtetba tajung agitsü ajungshia liasü.
Iba sentong ya Chennai nung aliba Naga nungertem ken aser chiyongtsütem ajanga longjemshitsü nükjidong nung ayongzükba liasü. Iba sentong nung Chennai nung alir Naga nunger nisung noklang aika arua aden.

You must be logged in to post a comment Login