The Great Decade teloki Mkg nung ken meimertem tzüratemdaktsü

Mokokchung, November 22 (TYO): Mokokchung jila nung alirtemi ‘rock and roll’ maneni meimer, ta sayatsü atema ‘The Beanstalks’-i The Great Decade telok ajungketja concert ka ayongzüka liasü; iba kenten sentong ya Mokokchung nung aliba ‘Just A Venue’ (JAV) resort nung ayongzük, ta Media & Publicity The Beanstalk, Longrangty Longchar-i sangdong ka nung metetdaktsü.
Rock kentener telok- The Great Decade ya 2016 küm Mokokchung town nung tenteta liasü aser iba telok ya Nagaland nung dang masü saka linük jenjang tashi nung nüngtugu band ka lir.
Iba telok nung züngsemtemji – Apang (vocals), Senti (guitarist), Tongpang (bassists), Ayu (keyboardist) aser Anok (drummer) nunger lir. Parnok dak aketba sempet den music industry nung jenjang tajungba alangzüktsü atema parnoki nendaka inyakba aser parnok dak tejangraba tanela aliba ajanga jila nung ken meimertem aika ajungmesor.
Parnok music ji timbaka Porcupine Tree, Dream Theater aser Freak Kitchen teloktem ajanga ajungmesoba lir. Parnoki 2017 küm Hornbill International Rock Contest nunga shilem agia liasü, ZOOMMAX, Kohima 2019 nung guest band ama shilem agi, Chennai NCF night aser Goodies Café 2019 nunga shilem agiogo.
Parnoki Mokokchung district nungi taruba Hornbill Music Festival nunga shilem agitsü. The Great Decade ajungketja The Beanstalks-i iba concert ya ayongzüka liasü, aser tickets yokzükba sen den tenla arubaji par telok nem agütsütsü.
The Great Decade teloki 1980s aser 90s mapang adokba ken tapu balala aika aten. Iba concert sentong ya Adang Jamir-i ketdangsüa liasü.
Iba sentong takok ngua agitetba atema The Beanstalk convenor, Bendang Chingmir-i sarasadem, senotsü aser nüngdak balala nung yariteper ajak dang pelaba lemsatep.