‘The Nightingale’ atema adianu Dakota aser Elle na lungjemtsü

Luchii/December 05, 2019 (Agencies): Adianu Dakota aser Elle Fanning naprongla tang mezüngbuba ‘The Nightingale’ nung külemi shilem agitsü ternemba lir.
Kristin Hannah indang novel nung ajemdaker Melanie Laurent-i yanglutsü (direct) aliba film nung Dakota aser Elle Fanning napronglai mezüng shilem agiba angutsü aser tenati ashiba agi, film ka nung lungjemer shilem agitsü maongka anguba ya künaprong mangdang atalokba ama lir.
2001 küm sayaba ‘I Am Sam’ film nung arishi küm 21 tain Elle-i küm 26 tain Dakota character Lucy indang adianu shilem agiba dak alaka, adianu ana yagi film ka nung danga külemi shilem agia mali. Kasa film (I Am Sam) film nung tenaprong dena shilem agiaka, iba film scene ka nung danga tena külemi shilem agia mali.
” ‘The Nightingale’ film nung tan mezüng künaprongla (Elle aser Dakokta) külemi shilem agiba angutsü. Kunapronglai mapang balala nung, küm balala asüdang aser film balala nung shilem agidanga lir, saka film ka nungdanga camera matsüngdang künapronglai scene ka nung shilem agidanga mali, ta adianu ana yagi The Wrap dang ashi.
”Küm aika atema, künati film ka nung danga lungjemer shilem aginüa liasü aser tang iba mangdang atalokogo. Adianu ama, künaprongla sempet lemsateptsü maongka anguba ya atangji nunga mangdang ataloker ama asütsü. Iba denji külemi, tasütait aser sempet tajung alila director, Melanie Laurent den külemi teka amteper inyaktsü asoshi yongyaseter,” ta tenati ashi.
Melanie, shibai ‘Galvenston’ nung Elle den külemi inyaka liasü, lai-a iba project atema adianu anaprongla nem shilem agidaktsütsü asoshi pelaba lemsatepogo.
Melanie-i ashiba agi, ”Fanning adianu den külemi film ka yanglutsü asoshi ni pelar aser iba ya ni atema konang ama lir.”