‘The Rolling Stones’ teloki kensep tasen ka renemtsü akok

04London, November 03 (Agencies): Britain nung tentetba rock kentener telok, The Rolling Stones-i taruba 2016 küm April ita nungi tenzüka kensep tasen ka renemtsü sentong renemba osang ka Digital Spy osang ajanga metetdaktsüogo.

Külem kentenertem den sensak asemba sülen par teloki taruba küm April ita nungi tenzüka studio nung ken record asütsü renem, ta Rolling Stones telok nung lead guitarist, Keith Richards-i osang jangjashitsü.

“Onok anogoshia tainba akümer saka tainba akümba ama, ozü telok anogoshia tajungba akümer. Aji oda, ozü teloki sangküm 2016 küm April ita nungi tenzüka studio nung kensep tasen renemtsü sentong renema lir,” ta arishi küm 71 tain Richards-i ashi.

The Rolling Stones teloki kensep tasenji asangsang nung adokra, par teloki küm 10 tsüngda nung tan mezüngsüa kensep tasen adoker asütsü.

Par teloki tesüsüa, 2005 küm kensep adokba sülenbo tanü tashi kensep tasen ka danga adoka mali.