Them ïew Mawlong nung alir nem mapang apuloktsür

Shillong, July 5 (TYO): Meghalaya kübok Them ïew Mawlong nung alirtemi parnok iba tesem nung alitsü ozüngi melar ta asüba kulikakettem sayutsü atema anogo 30 nü apuloktsüogo.
High Level Committee (HLC)-i tuyuba nung ajemdaker May 31 nü Shillong Municipal Board (SMB)-i Them ïew Mawlong nung alir kilen 300 dang parnoki iba tesem nung alitsü ozüngi melar ta asüba kulikakettem agütsütsü atema metetdakja liasü.
June 3 aser July 3 tsüngda parnoki kulikakettem agütsütsü atema mapang latettsü. Ajisüaka, July 3 tashi nung nisung shingaia kulikaket magütsü.
Brihostibarnü deputy chief minister Prestone Tynsong menden ser High Level Committee senden amendang iba onük benoka lemsatep aser ano anogo 30 agütsütsü atema telemtetba agi.
Shillong Municipal Board-i sangdong agütsüba anogo nungi tenzüker anogo 30 ji azüngtsü.
Sangdongji kilen shia dangi aser parnok atema okatsürtem den Harijan Panchayat Committee chairman dangia yoktsü.
Them ïew Mawlong nung alirtemi sangdong nung ashiba meinyaker kechi inyaktsü ta osangbenertemi asüngdangdang Tynsong-i “Shillong Municipal Board-i iba tesem nug mapa inyakba sülen tashi anidaktsü atema Meghalaya High Court-i tetuyuba jangjajangja agütsüogo. Anungji parnoki haihaura kaa tashi angatsü mesüra mangatsüji parnok molung” ta langzü.
Iba tesem nung alir sorkar mapa inyakertemia tashi manga nung koda ta asüngdangdang “HLC-i anogo 30 ji atatsü’ ta Tynsong-isa langzü.
Tynsong-i parnok iba tesem toktsür aotsü shiogo ta Harijan Panchayat Committee
-i jembiba atema Tynsong-i ashiba agi “parnoki kechi jembinür jembiang. Parnok yangi küm 200 liyonga arur ta ashir. Anungji parnoki kulikaket agütsütsübaji khuret masütsü ta bilemer.”
Them ïew Mawlong nung alirtem asoshi sorkari telemtetba tajung ka aginür kechiyong parnok iba tesem nung kanga timtema alir ta Tynsong-i taoba mapang shia liasü.