Themreichon Leisan-i züluba ‘Homesick for another world’ sayaogo

Abelen nungi achichi: Dr. Kekhrielhoulie Yhome, Advisor, School Education & SCERT, kaket zülur Themreichon Leisan aser Publisher Vishü Rita Krocha nungertem “Homesick for another world” kaket sayaba mapang tangokba noksa ka yangi angur.

Dimapur, Rongjui/Sept. 18 (TYO): PenThrill-i adokba kaket 125 buba, “Homesick for another world” sayaogo. Iba kaket ya Themreichon Leisan-i zülu aser September 17 nikongdang Nagaland State Guest House, New Delhi nung Advisor, School Education & SCERT, Dr. Kekhrielhoulie Yhome-i sayaja liasü.

Tribal nisungtem lunük telungzük nunga tesem balala nung prokshia oa aliba mapang ka nung lanurtem shisaliok aser mapa atema yimti tem bushia prokshir aser ki menungraba aitdaktsür, ta Dr. Kekhrielhoulie Yhome-i ashi.

Pai ashiba agi, “iba poetry collection ya sobaliba mamatetba indang genre tasen ka lir koba ajanga taküm nung ajangshiba aser pei sasa bilemba tem lemsateper.”

Iba ama yimya nung züluba ya yakta aintsü imlar, ta pai ashi. Kaket zülur Themreichon Leisan ya Ukhrul, Manipur nungi lir aser kaket azünger tajung, shibai book reviews zülutsü jangrar la metek aliba agi ajungmesoa otsü yangluir.

Leisan ya University of Delhi nungi English Literature nung Master’s Degree ngua lir aser taoba mapang tesayur inyaka liasü aser tang New Delhi nung alir aser yangji mapa inyaker.

Ola madoki ajungmesoba aika aliba ajanga iba kaket ya zülutet aser ibai kü kisüngi masü saka lai la dak amang metenzükdang la dak tamang akaba nisungtem den sensaksemba aser ajungmesoba ajanga kaket ya zülu, ta lai ashi.

Kaket menünger Vishü Rita Krocha-i iba kaket ya PenThrill-i adokba kaket 125 buba aser Manipur nungi züluba kaket pongu buba alitsü, ta ashi.