Theology zünger Tsüngrem tenzükba aser ordination agiba

~ L. Kika  Pongener.

Asen limai Yisu yimsu osangtajung arur küm noklang ka ser tenem abensatsüba küm ana-asem dang lir. 19th Century tatemlen British nunger hoküm agi American Baptist Missionary-tem Naga lima nung melitettsüsa aküm nungji, Rev. R. F. Delano asen Naga lima nung American Baptist Missionary tatempangba, pai 8th February’1955 nung Impur toktsür aotsüsa aküm. Anungji Impur Mission Field mapa ajunga Rev. L. Kijung nem toktsür ao (Ref. Nokinketer Mongchen page-132). Iba sulenbo Impur Mission Field mapaji asen Aor Tsüngrem lartemi dang melentepa bener aru. 1960s mapang tashi nung arogotem nung Pastor & Tesayula teimba class 5-6 azüngertemi sayua aru. Meilungi Impur Bible School nung azüngertemi sayua aru. Ano iba sulen arogo kar nung B.Th. azünger ayuba ngua aruogo.
Tanü-bo Ao arogo ajak nung toklang tenzüker BD. & M.Div. azünger teimba yua lir. Ano arogo kar nungbo M.Th & Doctorate azünger-a yua lir. Jokorla, tanübo alima tejakleni aoba den liromedema, arogo nung Sannuker-tembo ajak M.Th. azüngerbosa ayutsüsa mapang agi menepogo. 1960-70s mapang tashi nung Impur (ABAM) nung tenzüker, arogo nung Pastor & Tesayula inyakerbo ‘Kodak Tenyar’ amai nukshia reprang. Iba mapang tashi nung Reverend-bo kanga bulua mali asü. Meilungi Impur (ABAM) nung tenzüker kar ordain asüba ngua aru, aser item Reverend-temjibo ano Tsüngrem amai kanga dang akümtsübu. Oda-oda kodang Theology azünger onsara küma-adok akhi ama-to masü tera pongpapongpaa küma-adok.
Tanü-bo mungdang & arogo nung tenzükertem Reverend-a aika dang kümadokogo. Anungji Theology zünger Tsüngrem tenzüktsüba ya kanga pongpapongpa masü, saka arokaroka shisadangerang telemtetba agitsüla, kechiyong Tsüngrem tenzüktsüba mapa ya kanga zübazübarbo masü. Shirnoki Theology zünger Tsüngrem tenzüktsü jangrar, pa/la dak bendanga agütsüba den tesayutsü sempet alitsüla. Ano sempet liaka arogo nung/tenzükba wadang balala nung tenzüka aodang aiben mezüngmeshi, tatala, nungsen aser sensak tia ajurutsü. Atangji Tsüngrem tenzükbaji Govt. & Company nung tenzükertem ama itasen tulu masütsü aser Facility tapu-tapu manung jangratema (Luxurius life) alitsüsa-bo masütsü akok. Iba ama tia ajurudangji, Tsüngrem tenzüktsü tajaba tejangja mekai tenzükertem aika rongsen nung tenuk yoker aibelentsü.
Ano kanga tekümdangtsü kaji, mozü-lar aser Yi-lar (Drug & alcohol addicted) kar Theology züngra melenshitsü sudi ta sur kangshia meyoktsüla. Ano tanür-ibo mejangrar sernung tsüraburi kangshia theology azüngi meyoktsüla. Ano karbo Youth Camp & Revival mapang medemer Theology azüngtsü nangzükba jilu benshia azünger-a alitsü akok. Atangji Tsüngrem tenzüktsü atema bendanga agütsüba den sempet melira, Theology Degree tulu azüngba agi dangbo mungdang aser arogo nung metenzüktetsü aser pa/la-a tezü danger atsüngzüka oa taküm tia raksatsü. Theologian lanur karibo tenla kidang shilem agidang ni Ao oshi kanga jungabo mejembiteter, anungji English agidang jembidi ta asüba-a karbo lir. Ano karibo Tsüngrem o tatsüka jembinung, Ao oshi tesadang ka, English oshi tesadang ka, aser ano tom-tom nung Nagamese-a terara enoksema jembiba-a ajuruogo. Ano Theologian lanur karbo sentong tila kar nung lenitsü shilem atatsü nung numametangteti lokti koka magitetba-a denjia aruogo. Hau, ajakbo kasa masü, Theology zünger bendanga agüja Tsüngrem tenzüker sempet tajung aketer aika lir. Anungji Theology azüngtsü telemtetba magidang tamasa pei sasa pei sempet angatettsüla aser tsürabur-ia pei jabaso-jala dak aketba sempet jungjunga angateter dang Theology züngdaktsütsüla.
Ano Theology Degree tulu zünger bendanga agütsüba Tsüngrem tenzüker karbo arogo-ibo kanga aginur sernung ‘Guide-line’ nung kümsuk tataktet ayuba agi sodi agütsütsüsa akümer. Taoba mapang lennir T. Imo Jamir-i olemsabang nung lemsatepba ama-to M.Th. & Doctorate tashi azüngba tashi nungbo arishi küm nung terabo tain küma-adoker, ajiser tenzükba wadang balala nung küm 15-20 bosa tenzük nungang pa/lai angazüka metetba shisatsü ajunga nubur dang sayutettsü, saka itemji ajungabo mesayujungi Guide-line nung ‘Retirement Age’ lateta ayuba agi anentsüsa akümer. Aji oda, Tsüngrem tenzükba mapa yabo sorkar mapa nung Pension agütsüba kümsuk den mapiteptsülaa ta bilemer. Anungji ‘Retirement Age’ lateta ayuba ya khen reprangshi nung ajungtsü sudi ta bilemer. Ano Tsüngrem tenzükertema ajakbo kasa masüji, arogo nung toklang tenzüker ka arogo ka nung dang küm aika tenzükra antsü (Egg) nunga teret chitet amai küma-adoker.
Aji oda, tenzüker/tenzükla jagi pei sasa angateter tim teinyaktsü meinyakra arogopur aika tai menaa metsüdaktaktsür. Anungji akok asübo toklang tenzüker ka arogo ka nung talangba agi küm-10 mesura küm-15 tashi dang tenzüktsü aser iba sulenjibo khen melenteptsü ta küm tataktet ka lateta ayu nunga ajungtsü asü ta bilemdanger. Ano Tsüngrem tenzükertem ‘Ordination’ agiba inyakyim nunga shisadangtsü olen kar lemsatepnur. Atangji ordination agiba ya ‘Temeshi Mapa’ ka asünung, melamela ngutetba mapa ka ama masü, saka kanga jenjang aketba mapa ka amai züngshitsüla. Aji oda, Tsüngrem tenzüker asüyongjia ajak kasa masüji ordination yabo Tsüngrem tenzükerbo ajunga (Compulsory) agütsütsüla ta-ka masütsüla. Ano ordination agitsü atema tenzüker/tenzükla taküm külibaji dang masü, saka pa/la tenzükba arogoji kechi tia nung lir (?) ta anguoka reprangdangtsü kanga tongtipang amai bilemer. Ajak dak alaka, arogotemi angatettsüba tongtipang kaji, ‘Ordination’ ya tembar tejungteper/temeimteper nem sempet agütsütepba mapa ka amai mebilemtsüla. Aser tenzüker/tenzükla kar ordination agitsü atema ‘Mungdang’ dangi abentsüsa kümra, pongpa-pongpaa mesui kanga dang retreta telemtetba agitsüla. Atangji ordination mapa ya Temeshi mapa ka asünung pongpapongpaa masü, kanga dang asüngteta, meshiteta, metsüngareta inyaktsüla ta kü tangatetba olen kar lemsateper.