Thongtsou yimtsüng amakertem merenshitsü: Y Patton

Dimapur, November 20 (TYO): Mejangjatetba nisung kari Thongtsou yimtsüng amakdang nisung taküm den rongsen laluba atema kanga süoki ia bilemer, ta Nagaland Deputy Chief Minister, Y. Patton-i ashi.
Y. Patton-i Home department repranger aser paisa ashiba agi “iba tesempatsü mapa inyakertem dak state sorkari ozüng tapet agi merenshitsü.”
“Iba osang angashili DGP aser Commissioner Nagaland nati anir telok ka lendong atalokba tesem tonga yok aser police peria lemzüktsüogo. Maneni, senior SP rank Officer ka lenisüba kübok SIT ka tenteta bushisüngdang südar” ta Y Patton-isa ashi.
“Iba tesem nung tensa azüoktetogo anungji ozüng nem aibelenertem merenshidaktsütsü atema tensa meraksatsü mepishir” ta Dy. CM-isa metetdaktsü.
Eastern Nagaland nunger aser kin lennirtemi maneni Naga nunger kibong ka ama liyonga aotsü atema sorkar den yariteptsü mepishir, ta paisa shisem.
“State sorkari osangtem anguba sülen akokba tashi takoksa ajurur nem teyari agütsütsü. Iba tesem nung tensa süngjemtsü atema sarasademer” ta Y Patton-isa metetdaktsü.