Thongwang-i “I Love My Mon Town” mapatong tenzüktsü

Dimapur, October 3 (TYO) : October 2, 2015 nü Private Station, Mon nung “I Love My Mon Town” mapatong tenzükogo.

Iba sentong nung tongti tesemdangerji Advisor DUDA, DPBD Chairman aser ‘ILMMT’ Chief Patron, N. Thongwang Konyak liasü aser tetushi süa jaokerji Mon atema Swachh Bharat Mission Ambassador Supongmeren Jamir liasü.

Sentong nung Thongwang Konyak-i o jembidang, Deputy Commissioner-i anir Mon nung sorkar ketdangsertemi mapatong tajung tenzükba atema tenüngsang agütsü.

Mon nung alirtemia jila tajungba kümdaktsütsü atema pei akokba tashi yaritepa inyaktsüla, ta Thongwang-i sa ayongzük.

Tetushi süa jaoker Supongmeren Jamir-ia ILMMT mapatong tenzükba atema tenüngsang agütsü aser paisa Swachh Bharat mission, infection control aser proper waste management system nunger indang temetettsü lemsatep.

ILMMT ajanga jila merüktettsü aser tobur tajungba kümdaktsütsü atema nübortemi yariteptsüla, ta Deputy Commissioner, Mon & Mission Director, W. Honje Konyak-i mepishia metetdaktsü.

Sensosangertemi pei indang ta bilemba tangatetba alitsüla aser nüngdakba civic maparen inyaktsüla. Pei nübo aser akokba teyaritep ajanga ILMMT mapatong takok ngua inyaktettsü aser kokra Mon jila adener oa mapa inyaktsü ayongzüker, ta Mon DC-isa ashi.

Iba sentong nung Lt. Col. B.C. Mohan Lal, 2 i/c 33 AR-ia nübortem dang merükmejutsü ayongzük, Mission Ambassador, ILMMT, Samuel Konyak-i ken ka aten, Sacred heart School nungi Wanmei Walim-i sangro ka azüng aser Model School kaketshirtem den lanurtemi Mission: ILMMT jilushi ka sayu.

ILMMT ya Mon district administration-i jila merüktettsü aser renlokdaktsütsü nükjidong nung tenzükba lir. Iba mapatong ya Swachh Bjarat Abhiyan kübok inyaker. yashi agiba sentong nung mendenji ADC Mon, M.A. Shihab (IAS) liasü aser sentong tembangba sülen lokti nübodoka mapa inyak.