Throttle Thrust III kanga takok ngua tembangogo

PWD, Minister, Tongpang Ozukum (teyong), den külemi jenjang balala nung takok angurtem sempet agütsüba sülen tangokba noksa nung angur.

Mokokchung, Luroi/August 3 (TYO): Spearhead Motorsports Initiation (SMI) puri ayongzüka Throttle Thrust third edition Longkhum yimdak kanga takok ngua tembangogo. Rogonü iba sentong nung PWD Minister Tongpang Ozukum tetushi tesemdanger liasü.
Taoba mapang metetdaktsüba ama iba tetoktepba ya jenjang ana küm a lemsar aka. Hill climb tetoktepba ya Luroi/August 2 nü aka aser Luroi/Aug 3 nü Autocross, (1300 CC tekübok aser 1300 CC aser SUV category) kaogo.
1300 CC tekübok tetoktepba nung team AMAM nungi züngsem Alem I Jamir-i team Spearhead nungi züngsem Meren Imsong (first runner-up) aser Team NAC nungi Lima Jamir (Second runner-up) koka temaba jenjang nung takok nguogo.
1300 CC tema tetoktepba, team NAC nungi züngsem Roukubeituo Kense-i kokogo. Pa sülen NAC nungi Kevin Ruro aser Delhi nungi Sandeep Sharma nati first aser second runner-ups jenjang ngutetogo.
SUV Category nung MSAM, Meghalaya nungi Kamalesh Das-i Delhi nungi Sandeep Sharma (first runner-up) aser team NAC nungi Roukubeituo Kense (Second runner-up) na madak takok ngua liasü.
Jurila award tem rongnung team Spearhead nungi züngsem Imlikumzuk nem rock of the year award agütsü aser Tongmeshim Longkumer-i most promising driver award angu. Overall champion, team AMAM nungi Alem I Jamir-i angu.
Iba sentong nung ojembidang tetushi tesemdangeri SMI tenüng sanga liasü. SMI puri state aser tanga state nung lanur motor enthusiasts tem ajungmesoa iba sentong tasembenbuba ayongzüka katetba atema parnok tenüng asang.
Takok angur aser shilem agirtem tenüngsanga, minister-i ashiba agi, takok angutsüji tongtibang saka shilem agibajia züngshir. Maneni Ozukum-i Longkhum Village Council, lanur lokti aser kaketshir lokti-i iba sentong nung shilem agir aser terprangi arurtem ajak pelashishia agizükba atema parnok tenüng asang.