Thuwu-ni Festival : Minister Yitachu-i public teyari meshir

November 16, 2016 nü Pughoboto nung Thuwu-ni Festival tembangba sentong nung Minister Yitachu, Minister Vikheho, Parliamentary Secretary Khumo aser PWD ketdangsertem külemi agiba noksa ka angur.

Kohima, November 16 (TYO) : Pughoboto nung ayongzüka amungba Thuwu-ni Festival tanü tembangogo aser iba sentong nung tongti tesemdangerji School Education & SCERT Minister, Yitachu liasü.
Thuwu-ni ya kümshia local MLA & PWD (R&B) Minister, Y Vikheho Swu-i ayonga amunger. Zunheboto district nung Pughoboto sub-division kübok yimtsüng 22 longjemtsü nükjidong nung iba benjung ayonga amunger.
Tanü sentong nung jembidang Minister Yitachu-i, “Naga nunger sobaliba saisapongtem aser sobalibaji asen oboula nunger mapang nungi benshia aru aser iba ya asen maitsü lir” ta ashi.
Tanü lanuputui Naga nunger sobaliba aser yimyatsüya agizüktsüla aser wazüka ayutsüla, ta paisa ayongzük.
“Jungang tejung, Naga nunger tasü itta asenok kin aser lokti balaka ta telemtetba agiogo aser iba nung ajemdaker asenok sasa yimten yimsüsüa aser shinga teyari magii alitsü ta nangzükogo. Anungji, India sorkari iba ya agizüktsüla aser Naga yimten tebilemtsü asoshi telemtetba ka agitsüla” ta paisa shisem.
“Tang tejembidak yimten ken o, public aser telok ajaki, telemtetba tajung ka agizüktettsüla. Asenoki yimten telemtetba ka angu nungdang Naga nunger melenshitsü aser Tsüngremi moatsüba li nung terenlok alitsü. Saka Naga nungeri telemtetba magizüki dang aser temulung melemtepi dang lira, asenok tejakleni aotsü melena tesüleni dang alutsü,” ta Yitachu-isa metetdaktsü.
Niuland-Zunheboto-Tuensang-Kiphire-Phek-Myanmar lenmang yangluba sülen, Zunheboto district ji Nagaland nung tiyongtsü tesem akümtsü, anungji district nung alirtemi maongka agitsü renema alitsüla, ta paisa ayongzük.
Paisa, Pughoboto Assembly Constituency nung alirtem dang terenlok tali angutsü atema 2018 State Assembly election nunga Vikheho pusema nungittsü ayongzük.
Tanep Yitachu-isa Executive Engineer PWD (R&B) Pughoboto indang office lapoktsü. Iba mapang Parliamentary Secretary L Khumo, Engineer-in-Chief Khupi Natso aser Chief Engineer K. Rhetso nungertem aden.