Tiago yiruba ajanga Atletico club shisa bulur

Madrid, November 29 (Agencies): Atletico Madrid nungi asayasang, Portugal nunger football asayar Tiago Cardoso tetsüng sükdangba ajanga ita pezü football masayatettsü ta Deobarnü metetdaktsüba sülen Atletico Madrid club timla samaogo.
Tan tasayadak La Liga asayamung nung Atletico Madrid-i 1-0 agi Espanyol akokba asaya nung asaya tenzüker minute 27 buba nung pai tesülen nungi Marcos Asensio tetsü kadangdang pa tetsüng achijilen sükdang, ta Xinhua osang ajanga ashi.
Yiruba sülen pa stretcher ka nung moapu nung anir tugoa tendangdang tetsüng kanga mejungi yiruogo aser memunui operation agitsüla ta doctor-i ashi.
Pa yiruba ya Atletico club asoshi kanga takoksa lir kechiba süra club nung pa ama midfield nung asayar aika mali.
Aji oda süaka Atletico coach Diego Simeone-i, January nung nisung melentepba mapang pa melena tangar anioktsü atema kecha mashi.
Pai, “Tang tangbo iba telemtetba agitsüji kanga karara,” ta pai ashi.