Tibet nungertem sadema yimsü südaktsütsüla : Nancy

Washington, Metsüremi 10 (Agencies) : Tibet nungertem nem atangji nung par sasa yimsü südaktsütsü atema America nunger lenir tazüng kati ayongzüka metetdaktsüogo.
59 buba ‘Tibetan Uprising Day’ anogomong nung Democratic lenir, Nancy Pelosi-i iba tayongzükbaji metetdaktsü.
“Rongsenren tsütsü tebilemtsü aliba mechi Tibet nung aliba meimchir temeten atema asenoki mejembira, alima kecha tesem nunga meimchir temeten atema jembitsü menüngdaker,” ta osang ka ajanga Nancy Pelosi-i metetdaktsü.
March 10, 1959 nung China sepaitemi par lima atsüngdokba anema kümshi ‘Tibetan Uprising Day’ amonger.
“Tibet nungertem aser temeshi nisung Dalai Lama-i tamang akaba agi tashi itshir asenok ajak longjemer tejakleni odi, aser Tibet nunger sobaliba, meimchir temeten aser tamangba yimsü ajak akhüm tsübua itemji teti atema shidak mapa küma inyaka otettsüsa Tibet nungertem
nem atangji nung par sasa yimsü südaktsütsü ajungmesor,” ta Pelosi-isa ayongzüka metetdaktsü.
Laisa ashiba agi, küm 60 shi tejaklen Tibet nungertemi tashiyim maparen ajangshia parnok timtem jenti ajuruogo.
Par sobaliba aser tamangba yimsü benshiba kija nung danga parnok temeten anema kanga mejungi inyakba indang Tibet nungertemi 2008 May ita nunga ola adoka alima dang ayimoktsüogo, ta Pelosi-isa jashia metetdaktsü.