Tiema-Khe & Addax na 2015 NSF asayamong prequarters-i iogo

Kohima, September 30 (TYO): Tiema-Khe Kidima aser Addax Football Club, D. Khel Kohima Village telok nati tanü Bodbar nü takok ngua asayaba sülen tang tasayadak 16 buba NSF football asayamong prequarterfinal nung shilem agitsü jenjang nguogo.
Tanü mezüngbuba asaya nung Tiema-Khe teloki goal 3-1 agi Veracious FC Phek telok madak takok angu.
Wesheko Mero-i tanü asaya tetenzüklen mezüngbuba goal agüja par Veracious telok temaba jenjang nung ajungkettsü saka Sorhosül Pucho-i asaya tenzüker minute 20 buba nung iba goal-ji meyipja par telok anaprongla kasa jenjang kümdaktsü.
Pucho-isa manei par telok asoshi goal 1 agütsüba yong par Tiema-Khe telok goal 2-1 agi temaba jenjang angu.
Külem asayar, Kevisekho Thokwe-i minute 62 buba nung takokba goal agüja par Tiema-Khe teloki tanü asayaji akok.
Sorhosül-i tanü asaya nung goal 2 agütsübaji densema ajak agi goal 8 tashi agüja tan asayamong nung goal timba agütsür asayar kümogo.
Tanabuba asaya nung, asaya tenzüker minute 15 buba nung Kevi Koza-i par Medziphema Village Students’ Union tenüng nung aser minute 64 buba nung Lanngamba-i par Addax telok tenüng nung goal 1 agütsüba yong iba asayaji draw nung tembanga liasü.
Tesülen, tie-breaker metsütepba sülen Addax teloki goal 5-3 agi tanabuba asaya akok.

October 1 nü asaya yamai alitsü:
1. Pro-Streax United Dimapur vs Khuzama YO @ 12:30 pm
2. Meriema Village YO vs Capital College of Higher Education @ 2:00 pm