Tiger-i Ahmed Khan’er film tasenba nung shilem agitsü

Mumbai, November 12 (Agencies): India nunger nungtugu choreographer, Ahmed Khan-i direct-süa yanglutsü renemba comedy film tasenba nung tongti shilem agitsü asoshi Tiger Shroff anioksemogo.
“Producer Sajid Nadiadwala den külemi lungjemer film tasenba yanglutsü maparen tenzüka lir. Yunus Sajawal-i film tasenba nung amshitsü oren renemba den külemi, iba film nung tongti shilem agidaktsütsü asoshi Tiger-ia anioksema lir,” ta Ahmed-i metetdaktsü.
Paisa ashiba agi, film tasenbaji 1997 küm Salman Khan-i tongti shilem agia yangluba ‘Judwaa’ film tanabuba asütsü akok ta jembitsü tenzüka lir saka iba osangji olulu dang lir.
Ajisüaka, sangküm 2016 küm tom nungi tenzüka tangoktsü renemba film tasenba nung Tiger den külemi tongti shilem agidaktsütsü asoshi tetsür actress-bo tanü tashi anioksema maliba osang jangjaogo.
Nungtugu film actor, Jackie Shroff’er jabaso, Tiger nem ‘Heropanti’ film nung tongti shilem agitsü maongka agüja, Sajid-i Tiger Bollywood nung mezüngsüa tetsüng ajemokdaktsüba osang bushiteta lir.
Arishi küm 25 tain Tiger-i tang Ekta Kapoor’er ‘The Flying Jatt’ film aser Sajid-i produce asütsü renemba ‘Baaghi’ film na nung tongti shilem tagidak lir.