Tiger Shroff-i yimti aika nung martial arts academy lapoktsü

Mumbai, July 4, 2017: Bollywood nung asoajen aser temang tesütep actor rongnung, Tiger Shroff-a ka lir aser pa dak rangloker lanur aikati pa ama temang tesütep akümtsü meranga gym-i aoer.
‘Munna Michael’ film star aser actor, Shroff-i mapang talangka nungi lanurtem nem martial arts training agütsütsü nükjidong liasü, ta osang angazüker.
Osang ajanga angazükba agi, Tiger Shroff-i linük tesem aika nung martial arts academy lapoktsü, aser mezüngbuba academy ji taruba ita (August) Mumbai nung lapoktsü sentong lir.
Osangkaket ka den jembidang Tiger Shroff-i, “Ni martial arts academy kar lapoktsü, Mumbai nung lapoktsü, iba sülen Pune nung aser North India nung kar lapoktsü. Meüzngbubaji August ita lapoktsü imlar. Martial arts facility ji nisung ajak atema. Iba ya kü nükjidong rongnung ka liasü, aser iba ya ataloka aruba atema pelar,” ta metetdaktsü.
“Tanüasüng lanurtem aikati temang anepalu masür. Aikati phone nung dang rangloker kazür. Ni parnok nem ibaji toktsür martial arts agidangtsüner,” ta ashi.
Tiger-isa, “Ni sapurtem timbaka tanurtem lir, anungji iba ya ni parnok atema tenzüktsür. Lanurtem shisaliok angutsüji kanga tongtibang,” ta ashi.
Arishi küm 27, Tiger ya akhi actor, Jackie Shroff’er jabaso lir.