Tila asüdang Tsüngrem o sayutsüla : Rev. Dr. N. Toshi

Dimapur, April 2 (TYO) : Alima nung koda lia aotsü aser kodaser kotak tongtettsü iba indang laishiba nung tejangja zülua lir. Anungji Tsüngrem o ji ajaki meimtsüla ta tanü Ao Baptist Church Diphupar nung ABAM Children Sunday amungdang o jembir Rev. Dr. N. Toshi-i ashi.
Tila tanürtem dang Tsüngrem o sayutsüla, saka sayuba kijaji teperi masü, parnokji Yisu Khrista metetba dangi anitsüla. Tesayuri Sunday school aser Child sentep nung minute 30 shi Tsüngrem o sayuba kijaji teperi masü, parnok dang mapang ajak nung Tsüngrem o ji sayutsüla, ibaji tanü tsürabur ajak khuret asütsüla, ta Rev. Toshiisa ayongzük.
Anogoshia minute 10/15 agiteta kidang kibok tekulem agiba, tanürtem dang Tsüngrem tsübutsü sayuba nungji tajangzük tulu lir, parnok dang ochiba lenmang sayua anitettsüla, aji mesüra parnok tain akümdang lenmang aibelena aotsü. Anungji kibongtem khen meyipa reprangshidi ta paisa Tsüngrem o jembidang metetdaktsü.
Tila asüdang nungi Tsüngrem o sayua anitetra, parnok tain akümdang iba nungi pilaa maotsü, anungji tsürabur ajaki tanürtemji tim lenmang nung sayutsüla ta paisa ashi. Tanü iba sentong nung tila tanürtemi Tsüngrem o azüngba, jilushi aser kenten menu balala nung shilem agiba ajanga tesentepertem temoatsü ngua liasü.