Tillerson-i China nung North Korea sentong atema jembitsü

Beijing, March 18 (Agencies) : US Secretary of State, Rex Tillerson Honibarnü Beijing tongogo aser pai North Korea den koma chiteptsü ibaji atema inyakyim tasen ka China ketdangsertem den alemteptsü.
US Tir Donald Trump’er cabinet nungi China semdangba mezüng züngsem Tillerson-i South Korea aser Japan linüktem semdangba sülen Beijing tonga lir. Pai Beijing nung Washington-i Pyongyang den inyakyim melenshitsü indang kanga aroka ia jembi aser lenmang ka mesüra kabosa teti lir, ta ashiba osangbenertemi metetdaktsü.
US Secretary of State, Tillerson-i Beijing tonga aruli China nung Secretary of State Wang Yi den tama ajurutep.
“Na arubaji kanga tongtibang ta onoki züngshir,” ta Wang-i ashiba osangbenertemi ashi.
Tillerson-i bendanger lenirtem anenzükba ki, Diaoyutai nung State Councillor Yang Jiechi dena ajuruteptsü sentong lir.
Pa Beijing nung Deobarnü tashi amungtsü aser iba nü China Tir Xi Jinping den senden ka amentsü.
South Korea aser Japan naprong nung Tillerson-i North Korea military temi tawa missile tasen tendangba dak ajemdaker parnok tasa den chiteptsü asoshi sentong tasen kar lemsatepogo saka iba osang tejangjabo memetetdaktsü.
Paisa, North Korea den tesendaktep tajung aliba linükji China ang lir, anungji iba mapa tasen nung ni China-a tendaktsütsü merangtsü aser Pyongyang-i nuclear sentong anentsü asoshi parnok nem nungdaktsütsü, ta ashi.
Hokolbarnü China Foreign Ministry nung otongdari ashiba agi, Korea peninsula nung tensa süngjema kümdaktsütsü aser nuclear sentong anendaktsütsü atemabo China-i olemtep ajak nung shilem agitsü renema lir.
Tillerson-isa Xi aser Trump na ajurutepa senden amentsü sentonga ka tatem küma renemer aotsü tebilemba lir.