Tillerson & Modi nati kiralongraba anema inyaktsü nangzük

New Delhi, October 25 (Agencies): Prime Minister Narendra Modi-i US Secretary of State Rex Tillerson den ajurutepa senden amendang US indang South Asia policy asoshi tenüngsang agütsü.
India aser US nati Afghanistan nung kiralongraba, kiralongra tamendakdak aser tejenokdak tesemtem samatsütsü atema külem alizüng yur mapa inyaker, ta Modi-isa ashi.
Rex Tillerson-i Iraq, Afghanistan, Qatar, Saudi Arabia aser Pakistan semdangba sülen Bodbarnü New Delhi tonga aru.
Trump indang South Asia policy nung pai Pakistan dang kiralongrartem jenokdaktsüra par linük anema mapa inyaktsü ta amokmeren aser Afghanistan nung yimjung bener arutsü atema India-i mapa tuluba inyaktsü ayongzük.
“Modi aser Tillerson nati India-US tesentaktep linük ana ajangzüktsü atema dang masü saka tesem ajungalen ajangzüktsü atema akangshitsü bangzünga renem” ta Ministry of External Affairs-i sangdong ka nung metetdaktsü.
Tenatisa kiralongraba inyakyim ajak anema teka amteper mapa inyaktsü aser South Asia nung tensa süngjemdaktsütsü aser kümzüka ayutsü atema yariteptsü tenangzükba agi, ta MHA sangdong nungsa shia lir.
Tanü Tillerson aser External Affairs Minister Sushma Swaraj na ajurutepa senden amen aser idangji India aser Pakistan tsüngda tesentaktep tajung alitsü süra Pakistan-i kiralongraba teloktem mejenokdaktsütsüla, ta telemtetba agi.
“Pakistan lennirtem dang ni kiralongraba teloktem anema mapa inyaktsü aser kiralongrartem yariba ajanga sorkari lendong ajurutsü akok ta tebilemba lemsatep,” ta Tillerson-i Swaraj dang ashi.
“Kiralongrartem jenokdaktsürtem magizüktsü” ta külem osangbener senden nung jembidang Tillerson-i ashi.
Külen, Swaraj-ia Pakistan-i kiralongraba maparen ageintsüla aser kiralongraba teloktem pusemba linük jagi tebilemtsü abentsü, ta metetdaktsü.
US Secretary of State-isa ashiba agi, “India’er mitkartem ajungkettsü atema Trump administration-i technology tajungtiba agi yariteptsü mulunga lir aser India sen F16 o F18 fighter jets tenangzükba agitsü atema kanga yongyar.”