Tim Akhümtsübu (T.Ken 76:1-2)

Asenoki Tsüngrem temeim indang angashir aser azünger saka ken ken Tsüngrem tsübutsü amadoker. “Na, oda na tsübutsü dang; aser na ken mit adokra ne tsüngdang shibai noktaktet?” (t.7). Asaphi kechi tetsübu indang ashir? Pai Tsüngrem uluba aser ain tsübutsü indang jembi.
Asenok Tsüngrem Chirtem lir, aser asen mulungjang nung Tanela Temeshi “Abba, Oba,” ta ayimtener. Asenoki “Kotak nung aliba obala” ta sarasademtsü akok. Asenoki Pa anasa aotsü akok aser Pai asenok anasa arutsü akok. Saka bilemtetang, Tsüngremji Tsüngrem aser meimchir. Pa kotak nung lir, aser asenok alima nung alir, aser kenü Pa den asenok kotak nung alitsü. Asenok ali takümji ken atema dang lir.
Tsüngrem tsübubaji tepuokdak alir obendanger tsübuba ama masü. Ibai kilir ka kibur tsüngdang atentena noktakba ama masü. Ibai tanuri Tsüngrem uluba aser Pa sentsüwangshi angateta akümba. Asenoki Pa tsübur kechiaser pa kanga tulu. “Yihuda nung Tsüngrem metetta lir: Israel nung Pa tenüng tulu” (t.1). Oh, Pa tenüng koda tulu! Alima nung meimchiri Pa tenüng tulu amajok nung tetshir. Koda tejashitsü! Asenoki Pa tsübur kechiaser Pa sentsüwangshi lir. “Tenemti dang nungia na sentsüwangshiba aser tamaren” (t.4).
Pa shiba aser Pai inyakba asoshia asenoki pa tsübur. “O Yakob Tsüngrem, nai arütsüba ajanga talungtsü o kor na süchia ogo” (t.6). Tsüngrem tsübuba nungi kechi adoker? Tsüngremi asenok tongpang rarar. Pa tsübur jakdang pa aor. Asenoki Pa jakdang noktaktettsü kechiaser
Yisui asenok asoshi mepishitsür. Asen temenen asoshi Tsüngremi mejashitsü. Yisui asenok asoshi anebalur. Asenoki Tsüngrem tsübudi, aser Pai asenok asoshi raratsü.
Nai Tsüngrem tsübutsübaji dalang. Aser nai Pa tsübutsübaji na kuli aika lir. Nai Tsüngrem nem tim akhüm tsübu agütsür asü? Pa shiba aser Pai na atema kechi inyak mapang agia shisadangang. Pa alidaki arung aser Pa külemang. “Kibuba tsübubaji shisatsü tetenzük lir” A.Shin 9:1).