Tim tenüngsang sempet

Yimten tashi aittsü, lokti tesünep nung alitsü aser alima topur junga renloka aotsü atema yimten (government) teinyaktsü kaji, mapa shitak meranga inyakertem ajioka tenüngsang sempet agütsüba aser meshitak inyakertem nem temerenshi agütsüba mapatem asütsü. Iba maparen nung center government-i kanga junga inyaka anguba mapa kaji, sepaitem nem parnoki taküm ajak bendanga agüja linük kümzüka ayutsü asoshi tsükchirtem anema raraba mapatem ajioka tenüngsang sempet aser naroküm agütsüba angur. Atangji, sepaitem rongnung aikati pei taküma sama majem aser metsübui tsükchirtem den rarar. Iba jagi asen lima sünepa alir aser nübortem ayip ajanger. Aji oda, item tasütait nokinketertem rongnunga lendong timtem aser tetsübutsü tensa ajak tizükteta tangar dak alaka tasüitta tsükchir koka raraba sepaitem kar mapa ajioka konang nüngsang sempet aser naroküm agütsür. Item rongnung tawa Naga nunger sepaitem rongnunga Nagaland Police nung Sub-Divisional Police Officer (SDPO), Kohima Wb. Atu Zumvu aser 12th Battalion, Parachute Regiment nung Captain Elisen Y Jami na nem linük asoshi tasütait mapa inyaker nem agütsüba naroküm aser sempet tematiba jenjang tasembuba Shaurya Chakra agütsüba ajanga tena dang masü saka Naga nunger ajak alima tsüngdang nümadangtetter. Atangji, tenati pei taküm agi tendanga tetsübu aser lendong ajak tizükteta ozüng raksar aser nisung tepsetertem bushia apuba mapaji yimteni mangu aser mangashi yutsütsüba mapa ka masü. Akhidang lepteptsüngtep putu nunga mangko bener arurtem nem naroküm tulu agüja ken mejema tentsü. Iba jagi nokinketertem tali tasü taitba aküm. Ajisüaka, tanü ochimashiba putu nung sepaitem shimba maparen nunga jungjunga tendanger tetemsü nisung shimer masü saka pei shimnütsü shimba inyakyim tamajung ka tenteta alinungji, sepaitemi linük kümzüktsü asoshi pei taküm bendanga agüja tsükchir aser kiralongrartem den raratettsü asü ta kanga rataa bilemer. Iba ama mapang ka nung, Naga nunger police tanishir ana nem ato kilonser Narendra Modi lia linük tir Pranab Mukherjee-i tasü tait nokinketer naroküm aser sempet agütsüba jagi Nagaland police tenüng kanga tuogo aser linük nung state ajak nung ajaki Nagaland police kanga akümketa bilemtsü. Iba amaji, nisung kati linük asoshi pei taküm dena bendanga agüja inyakba mapa agi pei kin aser pei nübor meraketdaktsür. Item ama tasütait nokinketertem tenüng asangtsü kanga tetemtsü. Iba jagi tanüngba purtema parnok amaji linük asoshi meranga inyaktsü ajungshir. Atangji, tenüngsang naroküm aser tetushi sempet ya sepaitem nem dang masü saka maparen balala nung pei ajangzüktsü mebilemi nübortem tenzükba mapa nung tangar dang nungi tajungba inyakertem ajioka parnok nem sempet aser naroküm balala agüja ajungshir. Item rongnung tongtibang sempet aser narokümji tesayurtem nem agütsüba naroküm aser sempet asütsü. Linük kümzüka ayutsü asoshi sepaitemi bendanga agüja inyakba ama tesayurtemi linük ajungkettsü asoshi nisung ajak senso tajung kümdakja sayutsü meranger. Ibayongji, küm shia tesayurtem nem tenüngsang sempet aser naroküm agütsür. Ajisüaka, kenken Nagaland nungbo school-ia junga maoba mesüra nendaka mesayuba tesayurtem nem dena junga sayuba naroküm aser sempet agütsüba osang angashir. Iba ama jagi shitak aser junga inyakertem tezüdangdaktsür. Iba amaji kodang mapa meshitak inyakertem o shitak inyakertem na kasasa jenjang nung amshidir, shitak inyakertema meshitaki inyakertem ama kümadoktsü. Tanü Nagaland office nung inyaker mapang shitak nung marubaji aser mapa mapang shitak nung merenemtetbaji shitak meranga inyakertem ajioka tenüngsang magütsüba aser mapa meshitak inyakertem memerenshiba ajanga atalokbatem asütsü. Ochimashi inyaker, mapa makoker, mapang shitak mamshirtem memerenshira, shitak ochishia inyakertem mapa amajok kümdaktsür. Iba jagi mapang shitak nung mapa shitak inyaker kata mali akümer.