Time indang ‘Most Influential People’ nung Paytm bushitetsang Vijay Shekhar densema lir

April 21, 2017 (Agencies): Time magazine ajanga taküm atema ‘100 most influential people in the world’ tenüng sangdongba nung India nungi Ato Kelonser, Narendra Modi aser Paytm bushitetsang, Vijay Shekhar Sharma-na dang lir.
Item nisungtem ya timbaka maparen balala tenzüker, artist, takataiter aser yimden yimsüsüba nung lenir dang lir.
Parnok 100 rongnung US Tir, Donald Trump, Russia Tir, Vladimir Putin, British Ato Kelonser, Theresa May nungertema tensema lir.
Donald Trump ya US Tir atema tokteptsü asoshi mebilemba mapang arishi küm 66 tain, Modi ya alima nung democracy tulutiba linük nung Ato Kelonser aküm, ta kaket zülur, Pankaj Mishra-ia Modi taküm otsü indang kaket ka nung züluja lir.
“Muslim nunger anema azüdokshi adokba nung temolung melemtetba ajanga US linük nung tetsüng ajemoktsü nokdang aser yimden yimsüsüba ren nunga aiben shilem magidaktsü, saka pai Twitter nungi nüburtem den jembi aser takar tulur asükümertem menden nungi aludaktsüba ajanga India ya tanaben tamaren kümdaktsütsü asoshi pai nangzük,” ta Modi indang Mishra-i züluba kaket nung shia lir.
Modi-i yimsü asütsü tashi ngutetba sülen India ya rongsenketsüng, alima yimden aser sobaliba nung temaba jenjangi ajungket, saka pai Hindu yimsü kanga metsünga-reta amangba ajanga nüburtem aika, talisa Muslim nungertem lenmang aisü nung tetsükdaktsü ajurur, ta iba kaket nung zülua lir.
India sorkari ajungbena shidisen tejenba shilem 86 mamshitsü asoshi sangdong, iba mapang arishi küm 43 tain, Sharma indang jenjang ajungket, ta Infosys indang co-founder, Nandan Nilekani-i osangkaket ka nung zülua lir.