Time Magazine: Priyanka tangar puatetter tarensen 100 nung densemogo

New York, April 21 (Agencies): Time Magazine-i 2016 küm atema renemba tangar puatetter nisung 100 tenüng tarensen nung Bollywood actress, Priyanka Chopra tenünga densemogo.

Time-i adokba magazine 6 rongnung magazine ka indang cover nung arishi küm 33 tain Priyanka noksa adokba osanga jangjaogo.

Tanüngba adoktem nung Leonardo DiCaprio, Nicki Minaj, Mark Zuckerberg o Priscilla Chan na, Chirstine Lagarde aser Lin-Manuel Miranda nunger noksa adoktsütsü renema lir.

America nung sayuba television sentong, Quantico nung yaküm nungi tenzüka shilem agitsü tenzükba sülen Priyanka alima ajungai meteta aküm.

Lai yaküm aser taküm na tsüngda nung People’s Choice sempet agizükba, Oscar sempet agütsüba, Jimmy Kimmel & Jimmy Fallon nati aniba television nung olemtepba sentong nung shilem agiba densema alima jenjang nung ayongba sentong balala nung shilem agitsü tenzüka lir.

Priyanka-i maneni Hollywood actor, Dwayne Johnson den külemi Baywatch film nung shilem agia, tan mezüngsüa Hollywood film nung shilem agitsü tenzükogo.

Priyanka den külemi külem sensopur, RBI Governor, Raghuram Rajan; tennis asayar mongin, Sania Mirza; Flipkart aroki tenteter, Binny o Sachin Bansal na aser Google CEO, Sundari Pichai nunger tenüngtema Time-i renemba tangar puatetter nisung 100 tarensen nung densema lir.

Taoba mapang nunga Bollywood actor, Aamir Khan; India Ato Kilonser, Narendra Modi aser nüngtugu cricket asayar, M S Dhoni nunger tenüngtema Time-i renemba tangar puatetter nisung 100 tarensen nung densema lir.