Timtem Anogotem (T.Ken 102: 1-11)

Taküm nung asenoki tarutsü sentong aika yanglur aser ajak ataloktsü ama imlaa alidang, timtem adoker aser teraksatsüba agi semdanger. Na sentong ajak tai leni aor ama bilemdang iba ken ya züngang. “O Kibuba, kü sarasadem angashiangma, aser teyari asoshi ni ayimtenba na tonga arudakjang. Kü timtem anogo nung kü dang nungi ne jak atsüka telima: kü dangi ne narong shijang; ni ajaba anogo nung kü dang yakta langzüangma” (t.1,2). Kechi ama anogo ka ken züluri ajurua liasü? Timtem anogo ka. Pai pa rongjena aliba ozü ka den medemdanga ashi. “Arem nung pelika ozü ama ni lir. Ni amua maor, aser kilem manung rongjena aliba alushijak ama küma lir” (t.6,7). Yamaji pai bilem- pa kilem manung ozü ka kija aliba ama pai bilem. Pai kilungi ir kar den telungjem kanü, saka pa kija liasü.
Ken züluri tsükchirtem pa anasa aru (t.8). Saka timatemba anogo aser atalaba anogo nung pai ashi, “Tsüngrem taochi ajanga ni iba anogo melenshitsü.” Aser ibai sarasademba anogo ka akümtsü. Pai kechi bilem aser angu aji pai Tsüngrem dang ashi. Pai ayimten, “Tsüngrem, nai dang mapatem melenshitsü akok.” Tsüngremi na asoshia mapatem melenshitsü akok. Pai tema tensa-tiaji memelenshitsü akok, saka Pai ne mulung nung bilemba melenshitsütsü akok. Idangji timtemba anogoji takok anogo agi melentsü akok.
Ajak timtemba anogo ka lir. Kodang tensa tia agi na menüpdir aser timtem na meketa arudir, Kibuba dang sarasademang. Pai timtemji koda takok agi melentsütsü metetta lir. Nai imlabalen nungi Pai ne sarasademtem melangzüaka, Pai pa sentsüwangshi asoshi ne dang tajungtiba inyaktsü.