Timtem maginertem

Alima nung shingaia timtem aser takoksa maginer. Ajisüaka, alima nung ya ochi lenmang ka lir aser ibaji timtem aser takoksa terakata magiang tajung aser tajangzük magitettsü. Aji oda, timtem tilakata magii anguba tajangzükjibo taila temoatsü asütsü, anungji senmang kümabo magitettsü. Iba tangatetba nung, nisung aikati pei lima aser nübortem ajangzüktsü asoshi taküm ajak tenlaa inyaker. Tanü putu nung balaka nübortemi timtem aser takoksa arema ola madokra, yimten lenirtemi pei ajunga asaa dang inyaka aotsü aser idangji teti atema nübortemsa akoksatsü. Iba ama tensa tiaji tang India nung Citizenship Amendment Act anema tesem ajaklen nübortemi anema nokdakba mapang ya ka asütsü. Iba ama tensa tia nung asenok o tangar na tsüngda tangatetba medemdang dang tetsüngda talangka ittepa angur. Atangji, tamalenbo Naga nungertem aikati pei lima aser nübortem asoshi pei taküma mapayu tenla agütsüogo. Ajisüaka, lia lia asenok Naga nungertem ya pei agitsü dang metetba aser pei ajangzüktsü asoshi inyakba nübortem dang kümogo. Aji oda, Naga nungertemsa asüyonga Nagaland nung alir Naga nungertem yagisa timtem aser takoksa maginüba amai reprangtetter. Tatishitsü agi, government nung alirtemi nübortem akoksatsüsa ochimashi mapa tulu inyakba mesüra tarutsü nung nübortem akoksatsüsa telemtetba agiba anema telok kari longkak aittsü sentong ayongzükaka nisung shingaia shilem magitsü, kechiyong indangjibo nisung shinga mazüng asütsü. Ano, telok kari ghonda 12 mokdangba sentong ayongzükra, ibajiang takoksa tuluba ta bilema nemnemtsü. Tangarbo yimteni nübortem akoksatsüsa telemtetba agiba anema nokdangdang, ni puang ta pei mapa ajak toktsür longkak aita nokdaker, ajisüaka asenokbo tawa NSF teloki ghonda 6 mokdangba sentong ayongzükba anema ola adokertema liasü. Item jagi tang ama benjongbentsü mapangbo nübortem nem timtem agüja longkoka aitba aser mokdangba sentong mayongtsüla ta nemnemer. Tetezü, longkak aitba aser mokdangba ya asenok azünga aliba mapangang ka ayongzüktsüla ta bilemer südi. Asenokbo asenok aser asen chirnurtem ajungtsü atema kenüa nübo matsüktsüla, nükenbelema masütsüla, timtema tak ta magitsüla, tenla agütsütsübo tejembia mejembitsüla saka tangar tangar dang belemtsüla ta asüba tangatetba asenok aika dak keta lir. Ano, aikati government nung alirtemi ochimashi inyakba aser nübortem akoksatsüsa telemtetba agibatem angateta liaka, pei adenba government asüba agi odang toktsür. Ibaji peisasa suseta asütsü atema inyakba mapa den kasa asütsü. Election temer külenbo peii yariba mesüra meyaribaji kecha bilemtsü mali saka goverment-i nübortem ajangzüktsüsa inyaker asü meinyaker ta asübaji dang tongtibang asütsü. Ashiko, tamalen tanga onüktem nung mesüra tang ama Citizenship onük nung longkak aitba aser mokdangba sentongtem nung asenok aikati shilem maginübaji timtem maginüba agi masü saka mangatetba agi asütsüa akok, anungji yimten aser lokti nung lenirtemi tang aser tarutsü nung nübortem akoksatsüsa yimteni lemtetba mesüra inyakba mapatem indang nübortem nem angatetdaktsütsüla. Tatishitsü agi, lenmang majungba anema longkak ait nung nübortemi kecha balala süoki ia mebilemtsüa akok, ajisüaka lenmang majungba ajanga gari lendong ajurur, garia raksar, totzü nung sen tali endoker, iba jagi gari bara tali meshir aser shirangertema talila timtem ajurur ta angateta shira, idangjibo nübortem ajaki tasüa majem longkak aitba sentong nungji shilem agitsüa akok. Aji oda, tang Citizenship ozüng latetba ajanga ya Bangladesh, Pakistan aser Afghanistan nung alir Hindu nunger lakh aika India nung senso küma alitsü aser item jagi asenok chirnurtem inyaktsüba mapa aser maongkatem agiadoktsü ta angatetra, senso ajaki ozüng lateta agibaji agienang ta nokdaktsüa akok. Yimteni kechi ozüng aser telemtetba agidir agiaka, iba jagi tajangzük aser takoksaji tangsa tangbo mangutsüa akok, saka senso shiai tang aser tarutsü lima tia indang bilemdanga tangateter ka ama, nüngdak süra, timtem aser takoksa terabo agia pei temeten asoshi tasü itta nokdakra, iba jagi asen lima tajungba küma yanglutettsü.