Timtem-tuoshi aika sülen takok süngjang angu : Remo D’Souza

Mumbai, January 8 (Agencies): Bollywood nung jenjang tajung ka tongtettsü asoshi timtem tekangshi jenti ajanga liasü. Iba tekangshi ajangshiba ajanga pai teti tangar angateta aria bilemer, ta Choreographer-director Remo D’Souza-i ashi.
Remo ya Bengaluru nung ‘middle class’ kibong ka nungi intet. Bollywood nung shilem agitsü asoshi mapang talanga kangshirang pai iba jenjang tongtet.
” Bollywood atongtsü asoshi kü lenmang kanga temelabo masü asü. Timtem aika ajangshia aruogo, saka teyanglur tsüngrem dang kanga pelar, kechiyong taküm nung tajung aser tamajung ajak ajangshidangogo. Anungji ni kü takok kanga ajemalua agizüker, aser maneni meranga inyaker,” ta Remo-i osangbener dang ashi.
Remo-i RD’s World ta ser pa indang juri ‘mobile app’ ka adoka lir. Lanur tsüngsangtsü nung aser ‘choreograph’ asütsü asoshi jangrartem nem pa den iba app ajanga shisa lemsateptsü asoshi maongka agütsütsü, ajidang masü pa indang mapa balalatema iba ‘app’ nung angutsü.
Pa indang ‘app’ atema Remo-i, “Iba ‘app’ nung jangratemtsü shilem asem lir. Ka nung pa indang osettsüsettem angutsü. Lanur tsüngsangtsü asoshi jangrartemi audition atema parnok tsüngsangba video tem yoktsü akoktsü,” ta ashi.
Pai iba nungi shimtsü aser ken tasen ka pai choreograph asütsü. Ano ita shia pai ken tasen ka inoktsütsü aser choreographer temi choreograph sür pa dangi yoktsü, kechiyong ibaji choreographer tem atema tongtipangtiba mapa lir koba parnok ajaki inyaker, ta paisa shisem.
Remo-isa ashiba agi, iba ‘app’ ajanga pai tsüngsangtsü asoshi jangrartem nem Bollywood-i ayongayonga aitsü asoshi lenmang sadema lapoktsüner.
” Alemlibo phone videos tem maliasü. Ni director tem ajak sülen maongka meshia anidak; khenkhenbo mapa angutsü asoshi, ken kasa nung 10, 12 ben nisung balala dangsa tsüngsanga sayu. Iba tekangshiji ni meteta lir, anungji ni akok tashi item tejangrartem asoshi lenmang tera temelaba kümdaktsüner,” ta Remo-isa metetdaktsü.