Tin Tazüngi Ola Tulu Adoker

– I. Zülu Pongen, Mongsenbai ward.

“Tin tazüngi ola tulu adoker” ya shin o lir. Meimchir yimya agi kodang tera meteta arudir aser jembitetdir idangji ajak metet ama aser ajak jembitettsü ama ulua bilemer.
Kodang nisung tain kümdir tebilemtsü aika arur, kibong mesütsü rongsen lenmang bushitsü tenzüker, aser kodang shisa tera kaa kümdir belema meinyaki ayong-ayonga mebelemi kaa ita alitsü lenmang bushir.
Tia kar-maka kaji asenok Naga nunger pei sasa meranga inyaka chiyonga arur, kodang India sorkar yimsüsüba ajanga asen dangi terenlok maparen nung rongsen lenmang balala bener aru, tamasabo yimsüsüri item rongsen ajanga terenlok mapa (development) ajak par kolok yari inyaka aru aser par kolok agi madongba ajanga centre sorkar dangi tanaben agir magimaba tanüngba senji meyipa yok. Saka tanü asüngbo Nagaland nung ita sen dak alaka (development) terenlok sen yabo centre scheme ajanga tang tiemba inyaker. Nagaland budget küm shilem aruba yabo legislator discretion amai tang kümdaksür. MLA or Minister karibo LADP fund nungi pei party nem terenlok mapa inyaktsü atema terara agütsür aser inyaker.
Ano ajakibo masütsü akok, saka minister secretary aser party tongdi lenirtem kari central scheme project bener arua terenlok mapa inyaker, saka karibo itemjia report sayutsü atema dang inyaker aser tajangzükbo kecha mekai akümer. Nagaland tilatiba nung paper nung anguba terenlok (development) reprangra Ango tzübuji Nagaland danga tuluba alitsü südi, Agri developmentji reprangdangra India lima tesadang kabo peritsüsa sorkar amshia lir. Horticulture nungia sungjanglijang agi alima asüngtsüsa sen agüja lir ta ashir.
Saka asen nüburtembo tata ken matura shisabulur, Bihar, Assam amala state nungi bener arua achir. Paper azüngdangbo mapangshia tenemtsüng lenmang aser highway balala yanglutsü sen agütsüba angur, saka lenmangbo tanü tashi teraksa nung timtem jajar. Ano yimsüsüri mapangshia nübur ochishia alitsü, meranga inyaka rongsen bushitsü tesayuba agütsür, lokti senden nungbo mangdang tajung akaba sayur, saka mapa agi mesayuteter. Leniri lenmang mesayuteter, nai meteta aliba teinyaktsü lenmangji lanurtem dang sayutsüla. Tanü yimsüsüri olabo tulu ayimoktsü, saka ochi maparenbo tazüngi ola tulu adokba amai dang lir.
O Naga legislatortem, nenoki sentsüh atsütsü metsübur, südoksünem nung lalushipongtsü matidaker, nenoki miim o jembitsü mesüra anisüngzüktsü atema mapangshia Kazürangai aor, idakji küonung mejangtsü sen lac kwika indoker. Nenok ochi mashi nembangtsü merangba tanübo internet ladaka akanungji memeiimshitettsü. ACAUT ajanga sen kwi centre nungi angu, kechi atema ajak chart nung adoka sayur. Oda project maparen atemabo toktsür ita sen tashi magütsütetba ya kechi sorkar(?). Asen lima nungi adokba, inyaktetba tanga limai bener aoba (export) kecha maka, India nunger senbong nung tang amoshia arur, iba nungjia ochi mashi ulura yabo melenshitsü mapang tongogo.
Naga nunger legislator aser secretary, commissioner aser directortemi Tsüngrem metet asübo yamaibo mesüla. Lai o nung Yohan 8:31,32 nung yamai ashir, “nenoki kü o nung lira, ajangla nenok kü nütsüng, nenoki ochiji metetsü aser ochi agi nenok nüchi kümdaktsütsü” Yisui Yihuda nunger dang tang ashir masü, saka asenok danga ashir. Asenok dak ochiji melira asenok alar; nüchi maka tetezü alar ta Yisui asenok dang ashir. Nenokibo nenok yimsüsür tulu ama bilema alitsü südi, aseni asen rongsen madak kibur küma lira ochishia ketdang asütsü, saka tangar meyong ketdangsür asübayong ketdangsüba nung ochi mashitsüsa akümer ta angatetdi. Na tangar kilir asünungji Kibuba Tsüngremi ne dang tajung kilir ta ajatsü asü tamajung kilir ta ajatsü aser taa kobala nai angutsü imlar. Shisadangang aser nai melenshira Tsüngremi agizüktsü mulunga aser yongyaseta atadagi.