Tindang Aser Shitak (T.Ken 119:137-144)

Kodangsa asenoki dokan nung oset alidir tajung, majung tendanger junger ta kuli zülua aliba repranger junger ta zülua aliba osettem alir. Kasaji chiyongtsü nunga tajung ta zülua aliba chiyongtsütem alir.
Tsüngremer O ji tendanger shitak ta ngutet. Ibaji kuli tejangja lir. “Ne tenangzükbatem tendangogo aser aji atangji, aji asünung ne tenzükeri aji meimer” (t.140). Ibai mi tesashi ajanga tendangba lir. Hon temeja metettsü asoshi mi tesashi nung tendanger, taribia yamaji tendanger. Asenoki Arogo otsü züngra aser Laishibaji reprangra, Tsüngrem O ji mi ajanga aoba angutsü. Abrahami ibai tendang aser shitak ta ngutet. Kongi aotsü memetet pai par ki toktsür ao saka pa Tsüngrem O kar liasü, aser Tsüngremi pa angu. Mosaia arem nung küm lir alidang Tsüngrem O tendang. Tenüngsang Ken nung Dawidi mi ajanga aoba asenoki angur. Pai kechi inyak ? Pai Tsüngrem O ji tendang.
Laishibaji tendang aser tetendangba nung takok angu. Ibai ochi, tiyazü kecha maden. Anungji ibai ajaki amangtsü akok. Otsü ajunga nung shirnoki Kibuba dak amang parnoki ashitsü akok, “Nai Tsüngrem O dak metaloktsü akok.”
Nai ne taküm nung Tsüngrem O ji tendanger asü? Na tang mi tesashi ajanga aotsü akok. Yamaji ka süra, nai timtem aremzükba kuli kaji Tsüngrem O ji temerük, tasüngtet aser amangtsü tetemsü ta nai kuli angutsü. Ne sasa Tsüngrem O ji tendangang aser ibaji atangchichila ta metetang.