Tir atema BJP-i Yeddyurappa nunger shimba Congress-i aitsür

New Delhi, April 09 (Agencies): Tanü Congress-i, Karnataka aser Uttar Pradesh state na nung BJP lenitsü atema party-i ochimashi ken o nung tarak keta alirtem shimogo, aser ibaji ajanga parnoki nangzükba ama meinyakba sayur, ta aitsüogo.
Osangbenertem den jembidang Congress otongdar, Manish Tewari-i, “Ato kilonseri ochi aser temerük atema jembir, ajisüaka state unit nung tekolak (Tir) asütsü atema ochimashi ken o nung tarak alirtem shimmer,” ta aitsü.
Tewari-isa, “Yimten temerük atema jembirtemi Karnataka nung BJP tongti atema B S Yeddyurappa nunger ama shimbaji mamangtettsüka, kechiyong chief minister ka ama ochimashi ken o nung pa tepoukdak yuogo,” ta ashi.
“Uttar Pradesh nung, PCC tongti atema shimsangji (Phulpur MP, Keshav Prasad Maurya) anema ken o ter benoka lir, item rongnung nisung tepsetba ken o densema lir. Iba yagi yimtenren temerük sayur asü(?)” ta pai asüngdang.
Ochimashi ken o nung tai tongloktsüba sülen party purtemi Yeddyurappa dang chief minister menden nungi alutsü tuyuba sülen pai 2012 küm BJP toktsü ajisüaka maneni 2013 küm pai BJP nung tanaben aden.
Yashi BJP-i state pongu nung party state unit Tirtem tenüng sangdonga liasü.