Tir Buhari’er sen aputsü onük magizüker: Nigeria Senate

Abuja, November 02 (Agencies): Nigeria Senate-i par Tir, Muhammadu Buhari-i bendanglen nungi dollar sen billion 30 tashi aputsü asoshi benokba onük magizüktsü telemtetba agiogo.
Tarutsü mapang, 2018 küm tashi Nigeria’er kiojen aser rongsenren mapatong takok ngua inyaktsü nükjidong nung Buhari-i bendanglen nungi sen aputsü onükji benoka liasü saka par Senate-i Buhari-i ayuba mangdang samatsüogo.
Tan Senate-i sen aputsü onük magizüktsü lemtetba ajanga Buhari-i ayuba lenmang tasen yanglutsü, aluyimtsüren jenjang tajungba kümdaktsütsü atema bilemba ama mapa meinyaki aliba power grid-tem tajungba küma yanglushitsü aser par rongsenren jenjang tajungba kümdaktsütsü lenmang nokdangtsür lir.
“Bendanglen nungi taruba küm 3 tsüngda nung sen billion 30 shi apuba ajanga ozü Nigeria linük jenjang tajungba kümdaktsütsü alizüng yua liasü. Ajisüaka, Senate-i sen aputsü onük magizükba ajanga mangdang tajung ajunga samatsüogo. Tarutsü anogotem nung kasa onük ya Senate nung benoktsü tebilemba lir,” ta Buhari-i aniba All Progressive Congress (APC) yimtenren telok nungi Senate Majority Leader, Ali Ndume-i tesülen metetdaktsü.