Tir candidate atema opposition den tama jembitsü: Amit Shah

New Delhi, May 27 (Agencies): Honibarnü BJP Tir, Amit Shah-i, BJP-i Tir candidate meshimdang opposition party tem tama ajurua jembitsü, ta metetdaktsü.
Opposition party temi longjemer Tir candidate ka shimtsü atema jembiba mapang ka nung BJP tongti leniri iba o ya jembiogo.
Tir candidate ka ajaki melungtepa shimtsü asoshi BJP-i opposition party tem den jembitsü asü? ta asüngdangba langzüdang Amit Shah-i, “‘Ajaki melungba’ ta asüba ya o ya lenmang balala aika nung amshir. Onoki opposition party tem densema ajak den o lemteptsü,” ta ashi.
BJP-i aniba NDA sorkari Hindutva nung ajemdaker Tir candidate ka shimra Congress,
Mamata Banerjee-i aniba TMC aser Left party temi secular opposition candidate ka shimtsü ta jembiba dak sendakba nung Shah-i, “Tang tashi nungbo onki tenüng ka danga shima mali. Onoki NDA teloktep party tem den tama jembitsü. Iba sülen ang onoki opposition party tem den jembitsü,” ta ashi.
Yashi Congress Party Tir, Sonia Gandhi-i BJP nung madenba party tem senden ka ayonga liasü, aser iba senden nung opposition party temi, Tir election nung BJP den melungtepa Tir candidate ka shimtsü mekokra onoki telemtetba ka agitsü, ta metetdaktsüogo.
Yashi senden tembangba sülen opposition party temi sangdong ka ajanga, “Tir aser tatong Tir menden atema election agitsü mapang ana nung lir. Teti agia sorkar tashi nung aliba party-i ketdangsüa tenüngtem benoker. Tang tashi nung iba atema osang kecha mali. Party ajaki agizüktettsüsa candidate ka mesangdongra, onoki candidate ka shimtsü,” ta sangdonga liasü.
Bihar Chief Minister, Nitish Kumar bo jelia sentong yanglua aliba ajanga iba senden nung medenteti liasü.
Tir election nung electoral college-i shilem agia Tir shimmer aser iba college nung vote ajak agi 11,04,546 lir, aser iba nungjagi BJP-i aniba NDA teloktep party tem vote ji 5,38,000 shi lir.
Tir election taküm July ita nung agitsü aser August ita nung tatong Tir election agitsü sentong lir.