Tir candidate shimtsü atema opposition lenirtem ajurutep

New Delhi, May 02 (Agencies): Election aika nung Bharatiya Janata Party (BJP)-i takok nguyonga aruba agi opposition party tem kümkümshiogo aser parnok rongnung telongjem nüngdaker ta bangjemogo.
Tanü opposition paty balala nungi lenirtem ajurua Sangh Parivar indang tangatetbatem anema longjemer raratsü asoshi parnoki o lemtepa liasü.
Communist Party of India (Marxist) tongti lenir, Sitaram Yechury-i, Tir candidate ka longjemer shimba ajanga opposition telongjem tendanger asütsü, ta ashi.
Communists party tem indang tangatetbatemji Congress party aser socialists party tem tangatetba den khenyongi balala lir.
Ano külen Congress lenir, Digvijaya Singh-i, Mahatma Gandhi aser Jawaraharlal Nehru nungeri ratettsüba secularism nungittsü atema mapang tongogo, ta ashi.
Secularism indang Gandhi tangatetba ajanga Rashtriya Swayamsevak Sangh nokdang, ta shia Singh-i, “Gandhi indang secular tangatetbaji India den kanga tapet,” ta ashi.
Janata Dal (United) lenir, Sharad Yadav ya Congress tangatetba anemer ka lir, ajisüaka tanübo pai taoba Ato kilonser, Indira Gandhi indang foreign policy pusema jembi, koba ajanga 1971 rara nung India-i takok ngua liasü.
Socialist lenir, Madhu Limaye sor küm 95 ajungba anogomung sentong nung item lenirtem sabang ka nung ajuruteptsüsa akum.
Party tem longjemtsü atema jembiba dak alia opposition lenirtemisa tekümdangtsü onüktema jembia liasü.
Congress lenir Singh-i, 1971 küm opposition party tem longjemer Indira Gandhi anema apuso saka tamakok angu, ta ashi. Iba mapang nungji Indira Gandhi-i yamai ashi, “Parnoki Indira anenjang ta jembi, saka nibo sensaktia anenjang ta ashir.”
Singh-isa, iba raraji nisungtem tsüngda masü saka tangatetba balala tsüngda rara ka liasü, ta ashi.
Yechury-ia, Tir candidate atema longjemer candidate ka shimbaji mezüng tetendangba ka asütsü. “Asenoki tamasa ibaji inyakdi. Iba sülen ang asenoki taruba meraji agitsü,” ta ashi. Yechury-isa, democratic party temi longjemer common minimum programme ka bangjema yanglutsüla, ta ashi.
Singh, Yechury aser tanga party lenirtemisa, Modi’er sorkar mapatongtem ajanga teshimtet nisung kar ket nung dang rongsen bendener ta bangjema liasü.