Tir election agiogo; NDA-i Naidu tatong Tir candidate shim

New Delhi, July 17 (Agencies): Hombarnü Parliament aser state assembly tem nung India nung 14buba Tir election agia nikongdang 5:00 ako nung tembangogo.
Polling station ajak agi 32 nung vote agüja liasü- Parliament House Room No 62 nung polling station ka aser state legislative assembly shia nung kaka liasü.
Tanep 10:00 ako nung Polling tenzüka liasü. Iba election nung vote agütsütsü temsüa alir MP 776 aser MLA 4,120 liasü.
State shia nungi ballot box tem Delhi nung bendenba sülen July 20 nü vote zünga kasa anogo nungsa election osang sangdongtsü.
BJP aser par teloktep party tem vote shilem 63 jungnüa lir aser Congress-i aniba opposition party tem vote shilem 35 dak tema lir.
Tang teinyakdak Tir, Pranab Mukherjee July 25 nü mapa nungi anisüngzüktsü.
Ano külen BJP Parliament Board senden amenba sülen tanü nikongdang sorkari, NDA tatong Tir candidate atema Information & Broadcasting Union Minister, M Venkaiah Naidu asütsü ta osang sangdongogo.
Iba osang metetdakja BJP Tir, Amit Shah-i, “Tatong Tir candidate atema ozü lenir tongti rongnung ka, Venkaiah Naidu shimogo,” ta metetdaktsü.
Arishi küm 69, Naidu ya 1949 küm July 1 nü Andhra Pradesh, Nellore district nung aso, aser paa RSS nübo ka lir.
Congress-i aniba opposition party 18-i tatong Tir candidate, Gopalkrishna Gandhi asütsü ta sangdongogo. Tatong Tir indang election August 5 nü agitsü.