Tir election ajanga BJP anema party tem longjemtsü: Sharad Yadav

New Delhi, April 30 (Agencies): Tir election atema opposition party temi longjemer candidate ka shimba ajanga BJP anema party tem longjem tenzüktsü, ta tanü JD(U) lenir, Sharad Yadav-i ashi.
Taoba hopta pai Congress tongti, Sonia Gandhi ajurua opposition party tem longjemer Tir election atema candidate ka shimtsü asoshi jembia liasü.
Taoba mapang JD(U) Tir, Yadav-isa, “Opposition party tem longjemtsü mapang tongogo, kechiyong tawa Uttar Pradesh aser Delhi municipal elections nung takok anguba tongtibangba kuliji, BJP nung madenba party tem vote lemsaba ajanga lir,” ta ashi.
Opposition party tongtitemi BJP-i aniba NDA candidate anema opposition candidate ka shimtsüji melungtsü asü? ta osangbenertemi asüngdangba langzüdang pai, ibaji ataloktsü imlar, ta ashi.
“Tir election atema akokba tashi opposition party aika sabang ka nung longjemtsü asoshi onoki merangdar. Longjemer candidate ka shimba ajanga BJP anema opposition party tem longjem tetenzüker asütsü,” ta paisa ashi.
Rajya Sabha züngsem aser taoba mapang Union minister-isa, Uttar Pradesh election nung BJP-i menden 403 nungi menden 312 tashi nung takok angu, ajisüaka Samajwadi Party, BSP aser Congress senteper vote shilem teimba angu, ta ashi.
Tir election nung opposition candidate ji shiba asütsü ? ta asüngdangba langzüdang pai, tenüngtemjibo tesülen ang lemteptsü, ajisüaka party tem tama longjemtsüla, ta ashi.
Nisung aikati Tir election atema opposition candidate asoshi Yadav shimtsü südi ta jembidar, aser pa dang iba indang asüngdang, saka pai telangzüba magütsü.
JD(U) tongti aser Bihar Chief Minister, Nitish Kumar aser Left party lenir Sitaram Yecury natia mapang balala nung Sonia Gandhi ajurua Tir election atema opposition party tem longjemer candidate ka shimtsü asoshi jembia liasü.
Tir ya electoral college-i shimmer aser tawa BJP-i Uttar Pradesh assembly election nung takok anguba sülen parnok jenjang tajungba kümogo, anungji iba election nung NDA candidate-i takok angutsü südi ta bilemer.
Ano külen opposition lenir aikati, taruba Tir election nung opposition party tem longjemra 2019 küm Lok Sabha election nung ano party teimba longjemer BJP anema tokteptettsü, ta bilemer.