Tir election akoktsü atema BJP asoshi UP election aser AIADMK ji tongtibang

Delhi, March 01 (Agencies): Tang presidential electoral college nung BJP votes lakh 3.80 jungnüa lir aser Tir election nung takok angutsü atema vote lakh 5.49 atongtsüla, anungji ano party-i vote lakh 1.7 nüngdaker.
Centre aser state tem naprongla nung BJP-i aniba teloktep party tem vote lakh 1 dak tema lir, anungji parnoki maneni vote 70,000 bo nüngdaker, ibayongji assembly menden 403 aser presidential electoral college votes 83, 824 aliba state, Uttar Pradesh ji party atema kanga tongtibang lir.
India Tir ya electoral college züngsemtemi shimer, aser iba nung züngsemtemji Lok Sabha aser Rajya Sabha züngsemtem aser Delhi o Puducherry na densema legislative assembly tem nung züngsemtem lir.
Electoral college nung züngsem shia votes jenjangji 1971 küm nütsüng census nung ajemdaker lir. Anungji votes jenjangji state shia balala lir. Nütsüng timtiba aliba state, Uttar Pradesh nungbo MLA shia vote jenjangji 208 lir aser vote jenjang ishitibaji Sikkim nungi MLA shia 7 lir.
Modi sorkari metongjemba vote 70,000 ji Uttar Pradesh assembly election nung menden aika nung takok anguba ajanga atongtsü imlar. Iba den külemi Punjab nung BJP-i tamkok angutsüa akok, anungji parnoki akok tashi UP nung menden aika nung takok angutsüla.
Tan UP election nung BJP-i menden 150 shi nung takok ngura parnoki UP nungi presidential electoral college vote 31,200 angutsü, aser parnoki menden 100 nung takok ngura electoral college nung vote 20,800 angutsü.
Tir election nung takok angutsü atema Modi sorkari tanüngba vote atema AIADMK dang nungi teyari meshitsüa akok. AIADMK menden ajak agi 50 (Lok Sabha nung 37 aser Rajya Sabha nung 13) lir, ibaji electoral college nung vote 35,400 lir. Iba dak alia Tamil Nadu Assembly nung MLA 135 indang vote ji 23,760 lir.
Tang Tir teinyakdak, Pranab Mukherjee melenzüktsü atema July ita nung election agitsü aser pa melenzüktsüpurtem rongnung- BJP lenir tain Murli Manohar Joshi, Lok Sabha Speaker Sumitra Mahajan, External Affairs Minister Sushma Swaraj, Social Justice & Empowerment Minister Thawarchand Gehlot aser shisashir, Narendra Jadhav lir.