Tir Hadi Yemen-i tanaben shilanger

Aden, September 22 (Agencies): Yemen Tir, Abd-Rabbu Mansour Hadi-i tanü Mongolbar nü Aden yimti tonga aoba osang ka sorkar ketdangsertemi metetdaktsüogo.
Par linük nung tensa kanga mejungi akümtsü tenzükba sülen Hadi-i par Yemen toktsür Saudi Arabia kübok Riyadh yimti nung taoba ita 6 tashi jenoka aliba sülen tan par Yemen-i tanaben shilanger lir.
“Ozü lenisang, Hadi-i Muslim Eid al-Adha benjungmong Aden yimti nung amongba sülen United Nations (UN) senden nung shilem agia o jembitsü asoshi New York yimti bushia aotsü,” ta ketdangsersangi ashi.
Yemen Ato Kilonser, Khaled Bahah den külemi, par minister 7 tashi Yemen anülulentip tsütsü tzüyimkümlen tentetba Aden yimti taoba hopta tanaben shilangba osanga jangjaogo.
Hadi nem Yemen Tir menden maneni abentsü temeten agütsütsü nükjidong nung Yemen den kidangsüa, Arabian Peninsula nung tentetba Saudi Arabia-i aniba teloktep Arab mitkartemi taküm March ita nungi tenzüka par tayimtsü amshia Yemen sorkar anemba Houthi telok anema rara aruba sülen Hadi-i tanü par linük nung tanaben tetsüng ajemoker lir.
Yemen yimtiba, Sanaa aser Yemen anüdoklentip tsütsülen densemba tesemtem nung tesep tentetba Houthi züngsemtem makdoktsü nükjidong nung teloktep Arab mitkar züngsemtem tang Yemen tonga aliba osanga jangjaogo.
Saudi-i aniba teloktep mitkartemi par tayimtsü amshia Sanaa yimti tanüa amakba sülen nisung aliba ki 2 poksatsüba den külemi, ishiba agi nisung 20 shi tepsetba osang bushitetogo.
“Sanaa anülulentip tsütsü Asbahi district nung missile 2 tashi kaloktsüba sülen nisung aliba ki 2 poksatsüba aser nisung 20 shi tepsetba den külemi, nisung ishika yirutsüba osang tang tashi nung jangjaogo,” ta mozü ketdangser kati osang jangjashitsü.
Teloktep Araba mitkartemi anogo ka tejaklena tanü amala amakba maparen inyakba ajanga ishiba agi nisung 50 shi tepsetba osang bushiteta lir.
Ano külen, teloktep Arab mitkartemi par tayimtsü amshia amakba maparen inyakba ajanga taoba anogo 4 tsüngda nung nisung 236 shi tepsetba osang bushiteta lir ta Houthi teloki ketdang asüba state news agency, Saba-ia metetdaktsüogo.