Tir-i IAF nung 30 Squadron nem President’s Colours agütsütsü

New Delhi, November 04 (Agencies): November 10 nü yangi aliba Air Force station nung sentong ka ayongzüka Tir, Pranab Mukherjee-i Air Force nung 30 Squadron aser 501 Signals Unit, Barnala nem Presidential Colours agütsütsü.
Air Force Unit mesüra Squadron-i linük nung rara mapang aser yimjung mapang junga inyaktetba atema agütsüba tematiba award rongnung President’s Colours dena lir.
Tanü Air Marshal, S B Deo-i item units nem tenüngsang agütsüogo.
Paisa, iba sentong atema renemshidar aser Air Force nung aerobatics team- Surya Kiran (SKAT)-i march past sayatsü aser helicopters display-a akatsü, ta ashi.
Pai ashiba agi, tang Indian Air Force (IAF) tayimtsü nung tasentiba fighters plain inoka lir aser tayongzükba balala atema renema lir.
Paisa, kiralongrartemi Pathankot amakdang asür tebü aser kinüngtsü nata iba sentong nung adentsü jaoka lir, ta metetdaktsü.
President’s Colour award angutsü aliba 30 Squadron ya Air Force Station nung 1969 küm November 1 nü tenteta liasü.
Tang iba unit ya Air Force Station, Pune nung lir aser South Western Air Command, IAF kübok lir.
Iba unit nung tang  ‘Sukhoi 30 MKI’ fourth generation fighter aircraft lir aser Wing Commander, A A Phansalkar tetuyuba kübok inyaker.
Ano 501 Signals Unit nem anüdoklen arrtsülen Punjab Sector kümzüktsü mapa lemzükja lir.  Iba unit ya Barnala, Punjab nung lir aser HQ Western Air Command kübok Group Captain Vineet Jindal tetuyuba kübok inyaker.
Iba unit ya 1966 küm tenteta liasü.