Tir-i kinüngtsü mang rongtokba sülen tatsüka tsüngda mapa tenzük

New Delhi, August 20 (Agencies): Tir Pranab Mukherjee kinüngtsü, Suvra Mukherjee tasümang rongtokba sülen mapang tatsüka tsüngda Bodhbar nü pai office mapa inyak tenzükogo.

Pa kinüngtsü arishi küm 58 Suvra tasümang rongtokba sülen pa crematorium nungi meyipa arur ghonda ishika tsüngda pai Rashtrapati Bhawan nung office mapa inyak tenzükogo.

Tir kinüngtsü Suvra Mukherjee mapang tatsüka shiranga aruba aser la tangu sashiba timtem ka adoka Hokolbar aonung hospital-i anir oa liasü aser Mongolbar anepdang 10:51 ako nung alima nungi pilaogo.

Tir-i mezüng office mapa tenzüka taoba mapang linük Tir Shanker Dayal Sharma asoba anogomung nung asür nem akhüm agüja liasü.

“First Lady (Suvra) tasümang anepdang 10:30 ako nung rongtok, aser anüngdang 12.30 ako nungi pai official mapa inyak tenzük,” ta tanü nikongdang Rashtrapati Bhawan ketdangser kati ashi.

Pei nija mangyimba toktsür linük asoshi Mukherjee-i external affairs ministry ketdangsertem dang Hokolbar nü Jaipur nung Forum of India-Pacific Islands Cooperation (FIPIC) senden amentsü aliba indang osang asüngdanga liasü.

Hokolbar nü FIPIC senden nung adentsü asoshi India-i arua aliba Pacific Island linüktem nungi lenirtem Tir-i tanü ajurua liasü.

Iba dak alia Tir Pranab Mukherjee-i taoba mapang Ato kilonser Rajiv Gandhi küm 71 ajungba anogomung nung asür nem akhüm agütsüogo.