Tir-i Maternity Benefit (Amendment) Act agizükogo

New Delhi, March 29 (Agencies): Tang nungi Maternity ozüng tasenba kübok sorkar mapa inyaker tetsürtemi maternity leave hopta 26 tashi angutsü.
Maternity Benefit Act, 1961 ajanga mapa inyaker tetsürtem tanur soa pentsüdang la sodi agiaka la nem itasen shitak agutsür. Iba Act tasenba, Maternity Benefit (Amendment) Act, 2017 Tir, Pranab Mukherjee-i agizükogo, aser iba Act tasenba kübok tetsürtemi maongka kar angutsü.
Iba ozüng tasenba ya employee 10 tema aliba establishments ajak nung benshitsü aser iba tajangzük ya mezüng tanur ana atema dang asutsü.
Tetsür shia mapai aidang la mapa nung aniokba establishment-i la nem tezüluba nung maternity ozüng tasenba kübok tajangzük balala indang metetdaktsütsü.
Ano tetsür ka maternity leave agiba sülena kidang nungi mapa inyaktsü atema la nem temelaba agutsütsü.
“Tetsür nem lemzüktsüba mapaji pei kidang nungi inyaktettsüsa mapa ka süra lai kidang nungi inyaktettsü akok.” ta shia lir.
Kasa Act kübok tetsür kati arishi ita asem dak tekübok kinü tanur ka pei chir ama agira (adopt) la nem maternity leave hopta 12 agutsütsü.
Maternity leave hopta 26 agutsübaji mezüngbuba tanur ana asoba atema dang lir. Tanur ana sülen tanur tasembuba nungibo tetsürla nemji maternity leave hopta 12 dang agutsütsü.
Organised sector nung tetsürtem tanur asoba aser pentsütsü atema maternity leave hopta 26 agutsütsü asoshi bill ya agizükogo, aser iba ya ajanga linük nung tetsür million 1.8 ajangzüktsü.
Maternity Benefit (Amendment) Bill ya March 9 nü Lok Sabha nung agizük aser Rajya Sabha nunga March 20 nü agizüka liasü.
Alima nung maternity leave talangtiba agütsüba linük anaji Canada nung hopta 50 aser Norway nung hopta 44 lir, aser tasembuba jenjang nung India asütsü.