Tir-ibo jembiogo saka PM-i ola madoker: Sonia

New Delhi, November 03 (Agencies): Tanü Congress Party-i Tir Pranab Mukherjee dang Linük Temzüng kübok pa tashi amshia linük nung mepetmesü tensa anendakjang ta takhangba agütsütsü atema Congress Tir, Sonia Gandhi lenisüba nung party lenirtem Rashtrapati Bhawan-i Tir ajurui lungkak aita aoba sülen Sonia-i Ato kilonser Narendra Modi aija jembiogo.
Linük nung akhümtsübutep maliba, tetsübu aser amokmeren aliba tensa ka nung Ato kilonseri ola madoker, ta Sonia-i ashi.
Tir Pranab Mukherjee nem agütsüba temepishiba nung Sonia-i, “Linük nung tamajung tatalokbatem ya asen lokti nung telemsa adokdaktsütsü asoshi sentong junga yangluba shilem ka lir aser iba atema Congress-i tebilemtsü akar,” ta shia lir.
“Sorkar den sentaktepa aliba nisungtem aser tentet kar mesüra Modi’er sorkar shilem kati linük nung telongjem raksatsütsü aser mepetmesü adokdaktsütsü meranger,” ta Congress tongti Sonia-i ashi.
“Tir-ia pa tangatetba lemsatepogo, ajisüaka Ato kilonseri ola madoker, koba ajanga item tatalokbaji pai agizüker ta jangja jangja sayur,” ta laisa shisem.
Sonia’er jabaso aser party tatong Tir Rahul Gandhi-ia, “Tan sorkar nung teinyaktak minister-i mi agi rongseta asüba tanur ana dang azü ajar. Iba ya Cabinet nung alitsüsa minister ka masü. Loktii nisungtem tepseter aser Ato kilonseri ola madoker,” ta ashi.
Hombar nüa Sonia-i Tir Pranab ajurua tang linük tensa onük lemsatepa jembiogo.
Taoba ita Tir Mukherjee-ia sentong asem nung, nübur temeyoktep balala aika aliba, India wazüka ayutsü indang jembiogo.