Tir Kovind aser PM Modi nati ‘Eid ul Adha’ salem lemsatep

New Delhi, Luroi/August 22 (Agencies): Tanü India linük Tir, Ram Nath Kovind aser Ato kilonser, Narendra Modi nati linük nung Muslim nungertem den ‘Eid ul Adha’ benjungmong salem lemsatep.
‘Eid ul Adha’ ya tanü Muslim nungeri alima tesem ajaklen mongogo.
Iba anogomong nung Tir, Kovind-i telongjem aser temeimtep alitsü atema nüburtem ayongzük aser Ato kilonser, Modi-i, iba benjungmong ajanga asen lokti nung adianu temeimtep taliba alitsü imlar, ta ashi.
Eid ul Adha salem lemsatepa Kovind-i twitter ajanga, “Senso ajak den Eid Mubarak benjung salem lemsateper, talisa India aser bendanglen asen adianu aser aianutsür Muslim nunger den iba salem lemsateper. Iba anogomong nung asenoki tenla agutsüba temeshi tanela atema benjunger. Asen lokti nung telungjem aser temeimtep alitsü atema asenoki longjemer inyakdi,” ta lemsatep.
Ato kilonser, Modi-ia twitter ajanga, “Id-ul-Zuha salem lemsateper. Iba anogomong ajanga asen lokti nung adianu temeimtep tanela indakjang,” ta lemsatep.
Iba dak alia Congress Party Tir, Rahul Gandhi, Union Finanace Minister Arun Jaitley, taoba mapang Jammu & Kashmir chief minister, Omar Abdullah aser Congress lenir, Salman Anees Soz nunger densema yimtenren lenir aikati iba anogomong salem lemsatepa liasü.
National Conference party lenir aser taoba mapang J&K CM, Omar Abdullah-i twitter ajanga, “Ajak den Eid mubarak salem lemsateper. Eid ajanga moajang. Iba benjungmong nüngtem nung asenoki asenok nem moatsüba nungi timtemertem den lemsatepa yaritepdi,” ta ayongzük.