Tir Kovind-i Ashoka Chakra angur Wani’er kibong ajuru

New Delhi, January 26 (Agencies): Tanü linük yimtiba, New Delhi nung India nunger 70buba Republic day anogomong nung linük Tir, Ram Nath Kovind aser Defence Minister, Nirmala Sitharaman nati Ashoka Chakra award angur, asür Lance Naik Nazir Ahmad Wani’er kinüngertem ajuruogo.
Wani ya telungpur liasü saka pa sepai akumba sülen yaküm November ita nung Jammu & Kashmir kübok Shopian district nung telungpurtem den khatepdang pai tasü itta rara aser taküm tenla aguja asü; tanü Republic Day anogomong nung pa nem India nunger tematiba gallantry award, Ashoka Chakra agutsü.
Wani kinüngtsü Mahajabeen aser Wani tetsü, Raja Bano nati Tir, Ram Nath Kovind ket nungi iba award agizük.
Ashoka Chakra angur, asür Wani nem külem sepaitem aser ketdangsertemia Jammu & Kashmir Light Infantry Headquarters, Rangreth nung pa nem akhüm tetushi agutsütsü.
Kashmir nungibo iba award mezüng agizüksangji Wani asütsü.
Osangbenertem den jembidang 162 Infantry Battalion Territorial Army nung CO, Rajiv Ranjan Singh-i, “Onoki Wani nem akhüm agutsütsü telemtetba agiogo, kechiyong linük den longjemer asenoki tasü itta tejakleni aotsü atema osang agutsür Kashmiri nunger rongnung pa ka liasü. Iba ya onok asoshi nümadangtsü mapang ka lir,” ta ashi.
Wani ya Jammu & Kashmir nung Kulgam district kübok Cheki Ashmuji nungi liasü, aser mapang ka nungbo pa telungpur liasü saka 2004 küm pai Territorial Army nung adenba sülen Rashtriya Rifles nung züngok.
Wani-i pa kinüngtsü den jabaso ana- Athar (arishi küm 20) aser Shaid (18) na toktsür pilaogo.
Yaküm November ita nung kiralongrartemi injang sashia khaloktsüba mapang nung pai Lashkar-e-Taiba (LeT) telok nungi district commander ka aser bendanger kiralongrar ka densema khaseta liasü. Iba rara nungji pa injang aikati yiru, ajisüaka pai maneni raraba sülen asü.