Tir menden atema ni candidate ka masü: Mohan Bhagwat

Nagpur, March 29 (Agencies): Tanü RSS tongti, Mohan Bhagwat-i, pa Tir menden atema tokteper ta osang prokbaji tiyazü lir, item osangji tai, ta metetdaktsü.
Pai ashiba agi, Tir menden atema pa tenüng benokaka pai ibaji magizüktsü.
“Taruba Tir election atema ni candidate lir ta prokba osangji tai lir. Media ajanga prokba osangji tai,” ta Nagpur nung sentong ka alidang Bhagwat-i ashi.
Bhagwat-isa, Sangh Parivar züngsem ka ama pai par telok aser lokti atema dang bendanga inyaker, ta ashi.
“Onok Sangh nung adendang tanga lenmang ajak shibangadok. Onoki Sangh aser lokti atema dang inyaker, aser Tir menden atema kü tenüng mebenoktsü. Kü tenüng benokaka ni ibaji magizüktsü,” ta pai ashi.
Anogo ana jakdang Shiv Sena MP, Sanjay Raut-i linük Tir menden atema Bhagwat tenüng benoka liasü, aser iba menden atema pa tetemsü lir, ta jembia liasü.
“Iba menden ya linük nung tematiba menden lir. Iba menden atema tarak maket ka shimtsüla. Tir menden atema Mohan Bhagwat tenüng benoka jembidar ta onoki angazükogo,” ta Raut-i osangbenerten dang ashi.
“India ya Hindu linük ka akumtsü süra Tir atema Bhagwat tetemsü asutsü. Ajisüaka iba telemtetbaji Uddhavji (Sena chief Uddhav Thackeray)-i agitsü,” ta paisa ashi.
Ano külen Congress-ia, party-i BJP tangatetbatem anema nokdaker, anungji telung nung o lemtetba sülen party-i Tir menden atema candidate sangdongtsü, ta shiogo.
Tanü Ato kilonser, Narendra Modi-i NDA MP tem ajak chiyung benjung kati jaoka liasü, aser iba sentongji NDA Tir candidate nungitdaktsütsü atema liasü, ta osang angazüker.
Tang teinyakdak Tir, Pranab Mukherjee kümsük July 24, 2017 nü tembanger.