Tir Mukherjee aser PM Modi nati Dr Ambedkar nem akhüm agütsü

New Delhi, December 06 (Agencies): Dr Babasaheb Ambedkar sür küm 60 ajungba anogmung nung tanü Tir, Pranab Mukherjee aser Ato kilonser, Narendra Modi nati asür nem akhüm agütsüogo.
Bharatiya Janata Party (BJP) lenir tain LK Advani, taoba Ato kilonser Dr Manmohan Singh aser Congress Party tatong Tir, Rahul Gandhi nungeria Parliament moapu nung Ambedkar kürakyanglu matsüngdang asür nem akhüm agütsüogo.
“Babasaheb (Ambedkar) ya, ajak kasa züngshitsü aser lokti ajak tesünep nung alitsü atema benoker ka liasü. Pa ya tepetzük tia nung alirtem aser timtem tia nung alirtem atema teimla ka liasü, shibai parnok timtem atema ola adok. Asen linük Temzüng yangluba nung pai shilem agibaji teti bilemtettsü,” ta tanü Ato kilonser Modi-i twiter ajanga ashi.
Ano Mumbai nung Chief Minister Devendra Fadnavis-ia Dr. Ambedkar nem naro tokja akhüm agütsüogo.
Maneni Congress Tir, Sonia Gandhi-ia BR Ambedkar nem akhüm agüja, pa tangatetba shisa tajungtemji linük atema teti leniba tangatetbatem asütsü, ta ashi.
“BR Ambedkar-i ajak kasa züngshitsü aser shinga talenba nung malitsü benokbaji asenok atema teti leniba tangatetbatem asütsü,” ta lai sangdong ka ajanga ashi.
BR Ambedkar ya 1891 küm April 14 nü aso aser 1956 küm December 6 nü asü.